Ázerbaıjanda Instagram men TikTok qoljetimsiz bolyp qaldy
ASTANA. KAZINFORM – Ázerbaıjanda Instagram men TikTok áleýmettik jelilerine kirý qıyndady. Qoldanýshylar bul platformalarǵa tek VPN arqyly qosyla alatynyn aıtyp shaǵymdanyp jatyr. Jeli jumysynyń buzylýyn keıbir sarapshylar mektepterde hıdjab kııýge qatysty jańa shekteýlerge qarsy narazylyqpen baılanystyrady, dep habarlaıdy BBC.
Basylym málimetinshe, el turǵyndary Instagram men TikTok-qa kirýde jappaı qıyndyqtarǵa tap bolǵan. BBC tilshisi júrgizgen tekserý barysynda da áleýmettik jelilerdiń qalypty jumys istemeıtini anyqtalǵan. Keıbir qoldanýshylar YouTube jumysynyń baıaýlaǵanyn, Gmail poshtasyna jáne ınternetke qosylýda qıyndyqtar týyndaǵanyn habarlaǵan.
Ázerbaıjan bıligi áleýmettik jelilerdiń buǵattalǵanyn resmı túrde rastaǵan joq jáne olardyń jumysynyń buzylý sebepterin túsindirmedi.
Degenmen bul jaǵdaı 21 qyrkúıekte qabyldanǵan mektep formasyna qatysty úkimet qaýlasyna baılanysty týyndaǵan narazylyqpen tuspa-tus keldi.
Qujatta hıdjab týraly tikeleı aıtylmaǵanymen, oqýshylar men muǵalimderdiń kıimi bilim berýdiń zaıyrlylyq qaǵıdatyna sáıkes kelýi kerektigi kórsetilgen. Іs júzinde bul talap mektepterde hıdjab kııýge tyıym salý retinde qoldanylyp jatyr.
Jańa tártipke qarsy birqatar mektepte narazylyq aktsııalary ótken. Olarǵa hıdjab taǵatyn qyzdarmen qatar basqa oqýshylar, onyń ishinde ul balalar da qatysqan.
Áleýmettik jelilerde taraǵan vıdeolardyń birinde oqýshylar «Hıdjab oqýǵa kedergi emes!» dep urandatqan.
Ázerbaıjan Іshki ister mınıstrligi mektep formasyna qatysty talaptardyń oryndalýyna kedergi keltirdi degen kúdikpen 37 adamnyń ustalǵanyn habarlady.
Vedomstvo málimetinshe, bir top adam Bakýdegi mektepterde bilim berý qyzmetkerlerimen janjaldasyp, memlekettik bilim berý mekemelerine zalal keltirgen, qoǵamdyq tártipti buzyp, kólik qozǵalysy men mektep jumysyna kedergi jasaǵan.
Sonymen qatar BBC-diń Bakýdegi mektepterdiń birindegi derekkózi joǵary synyp oqýshylarynan saqaldaryn qyrý talap etilgenin aıtqan. Alaıda úkimet qaýlysynda saqalǵa qatysty talap joq.
Bul másele qoǵamda túrli pikir týǵyzdy. Bılikti synaýshylar jańa shekteýlerdi dinı senim bostandyǵyna qysym dep baǵalasa, bılik ustanymyn qoldaýshylar ony zaıyrly bilim berý júıesin qorǵaý jáne syrtqy dinı yqpaldyń aldyn alý sharasy dep esepteıdi.
«Bilim jónindegi keńes» qoǵamdyq birlestigi hıdjab máselesin saıasılandyrmaýǵa shaqyrdy. Uıymnyń pikirinshe, dinı sezimdi saıası maqsatta paıdalaný qoǵamdaǵy turaqtylyqqa, tózimdilikke jáne ulttyq-rýhanı qundylyqtarǵa keri áser etedi.
Saıası sholýshy Farhad Mamedov te balalardyń syrtqy dinı yqpal quralyna aınalmaýy kerektigin atap ótti.
Aıta keteıik, Ázerbaıjanda mektepte hıdjab kııýge qatysty shekteýler buǵan deıin de engizilgen. 2011 jyly Bilim mınıstrliginiń osyndaı sheshimi Baký men Nardaran eldi mekeninde jappaı narazylyqqa ulasqan. Ol kezde polıtsııa sherýge qatysýshylardy ustap, keıbiri bas bostandyǵynan aıyrylǵan.
Datareportal málimetinshe, halqy 10 mıllıonnan asatyn Ázerbaıjanda 9,27 mıllıon ınternet qoldanýshysy bar. Instagram aýdıtorııasy 4,25 mıllıon, TikTok qoldanýshylary 7,61 mıllıon, al Facebook aýdıtorııasy 1,65 mıllıon adamǵa jetedi.
