Ázerbaıjanda eshkim bilmeıtin erekshe ańnyń mýmııasy tabyldy
ASTANA. QazAqparat - Ázerbaıjannyń Tovýzsk aýdany Ibragım Gadjılı aýylynda oryn alǵan erekshe jańalyq jergilikti turǵyndardy dúrliktirdi. Aýyl aýmaǵynan belgisiz janýardyń mýmııalanǵan súıekteri tabyldy.
Bir qaraǵanda súıek usaq dınozavrdyń qańqasyna uqsaıdy. Alaıda, onyń qandaı janýar ekendigin eshkim dóp basyp aıta almaı otyr. Aýyl turǵyndarynyń sózine qaraǵanda, mundaı jaǵdaı bul mańda buryn-sońdy bolmaǵan.
Belgisiz janýardyń súıekterin aýyl turǵyny Mýrvet Gýlıev tastardyń arasynan taýyp alǵan. Turǵyndardyń aıtýynsha, tıin, egeýquıryq jáne tyshqan syndy kemirgishter bul mańda kóptep kezdesedi, alaıda tabylǵan janýardyń súıegi olardyń eshqaısysyna uqsamaıtyn bolyp shyqty. Onyń tisteri men tyrnaqtary bul mańdaǵy barlyq sútqorektilerden ózgeshe.
Aýyl turǵyndary tabylǵan janýardyń qańqasyn zertteý jáne onyń qaıdan shyqqandyǵyn anyqtaý úshin tıisti oryndarǵa tapsyrýdy josparlap otyr.
