Ázerbaıjanda ereje buzǵan jarty mıllıonnan astam TikTok rolıgi óshirildi
ASTANA. KAZINFORM — 2026 jylǵy sáýir-maýsym aralyǵynda TikTok Ázerbaıjanda platforma talaptaryn buzǵany úshin 570 myńnan astam beınerolıkti óshirdi. Bul kompanııanyń bıylǵy ekinshi toqsan qorytyndysyna arnalǵan esebinde aıtylǵan, dep habarlaıdy Kazinform agenttiginiń osy eldegi menshikti tilshisi.
TikTok dereginshe, joıylǵan beınerolıkterdiń 99,6 paıyzy paıdalanýshylar shaǵym túsirgenge deıin anyqtalǵan. Sondaı-aq ereje buzǵan kontenttiń 93,2 paıyzy jarııalanǵannan keıin alǵashqy 24 saǵat ishinde óshirilgen.
Álem boıynsha osy kezeńde jeliden 188 mıllıonnan astam vıdeo alynyp tastaldy. Olardyń 99,5 paıyzy paıdalanýshylardan shaǵym túskenge deıin anyqtalsa, 92,7 paıyzy jarııalanǵannan keıingi alǵashqy 24 saǵat ishinde óshirilgen. Sonymen qatar joıylǵan beınerolıkterdiń 97,4 paıyzy jasandy ıntellekt pen basqa da avtomattandyrylǵan júıelerdiń kómegimen anyqtalǵan.
Budan bólek platforma jalǵan akkaýnttar men qoldan jasalǵan belsendilikti anyqtaý jumysyn kúsheıtken. Úsh aıda TikTok 352 mıllıonnan astam jalǵan akkaýnttyń ashylýyna tosqaýyl qoıyp, 6,2 mıllıard jasandy laık pen 2,7 mıllıard jalǵan jazylýshyny, sondaı-aq jalǵan akkaýnttardan jazylǵan 190 mıllıon pikirdi joıǵan.
Avtomatty moderatsııalaý júıeleriniń keńinen qoldanylýy áleýmettik jelilerdegi kontentti baqylaýda JI-dyń mańyzy artyp kele jatqanyn ańǵartady. Degenmen algorıtmderdiń qanshalyqty dál jumys isteıtini jáne zań buzbaǵan jarııalanymdardyń qate óshirilý qaýpi de alańdatady.
Sondyqtan moderatsııa erejeleriniń ashyq bolýy jáne platforma qabyldaǵan sheshimderge shaǵymdaný múmkindigi mańyzdy. Áleýmettik jeliler endi ereje buzýshylyqtardy der kezinde anyqtap qana qoımaı, paıdalanýshylardyń quqyǵyn da qorǵaýǵa tıis.
Buǵan deıin Ázerbaıjan mektepterinde sabaq kezinde telefon paıdalanýǵa tyıym salynǵany habarlanǵan bolatyn.
