Ázerbaıjanda eńbek sharty joq jumysshylar úshin jańa medıtsınalyq saqtandyrý erejeleri engiziledi

ASTANA.KAZINFORM — Ázerbaıjanda beıresmı sektorda jumys isteıtinder úshin mindetti medıtsınalyq saqtandyrý jarnalary engizildi, dep habarlaıdy Kazinform agenttigi. 

Ázerbaıjan Parlamenti Mindetti medıtsınalyq saqtandyrý týraly zańǵa túzetýler engizip, resmı eńbek shartynsyz jumys isteıtin azamattarǵa qosymsha mindettemeler júktedi.

Túzetýlerge sáıkes, beıresmı sektorda jumys isteıtin jáne tabys tabatyn barlyq adam Mindetti medıtsınalyq saqtandyrý qoryna (MMSQ) aı saıyn shamamen 16 manat (shamamen 10 dollar) saqtandyrý jarnasyn tóleýi tıis. Tólemdi keshiktirgeni úshin tólem somasynyń 10% kóleminde aıyppul salynady.

Jańa erejeler aýyl sharýashylyǵy jumysshylaryna, qolónershilerge, resmı kelisimshartsyz qyzmet kórsetetin jeke tulǵalarǵa jáne is júzinde jumys isteıtin, biraq resmı tirkelmegen jeke kásipkerlerge qoldanylady.

Resmı túrde jumyssyz dep tanylǵan jáne memlekettik áleýmettik kómek alatyn azamattardyń jarnalary memleket tarapynan tólenedi. Olarǵa qoıylatyn sharttar ózgerissiz qalady. Zań shyǵarýshylar jańa erejelerdiń maqsaty mindetti medıtsınalyq saqtandyrý júıesiniń qamtýyn keńeıtý, medıtsınalyq qyzmetterge teń qoljetimdilikti qamtamasyz etý jáne elde resmı jumyspen qamtýdy yntalandyrý ekenin atap ótti.

BAQ-ta qazirgi ýaqytta resmı túrde jumys isteıtin uıymdardaǵy qyzmetkerler jalaqysynyń 2%-yn, al jumys berýshiler mindetti medıtsınalyq saqtandyrý qoryna taǵy 2%-yn aýdaratyny týraly habarlandy. Jumyssyz azamattar úshin 16 manat kóleminde bekitilgen mólsherleme usynylady, bul eń tómengi jalaqynyń 4%-yn (400 manat) quraıdy.

Buǵan deıin 2026 jylǵa qaraı mindetti medıtsınalyq saqtandyrý júıesimen taǵy 1 mıllıonnan astam qazaqstandyq qamtylatynyn habarlaǵan edik.