Ázerbaıjanda elshilikke lańkestik shabýyl jasamaq bolǵan kúdikti ustaldy

Ázerbaıjanda Memlekettik qaýipsizdik qyzmeti (MQQ) sheteldik elshilikke jasalmaq bolǵan lańkestik árekettiń aldyn aldy. Kazinform agenttiginiń tilshisi bul týraly jergilikti BAQ-qa silteme jasap habarlaıdy.

Tergeý nusqasy boıynsha, qamaýǵa alynǵan M.H.Hýseınzade atys qarýyn satyp alyp, uzaq ýaqyt boıy Baký qalasyndaǵy shet memlekettiń dıplomatııalyq ókildigine baqylaý júrgizgen.

16 qarashadan 17 qarashaǵa qaraǵan túni ol ǵımaratqa kirip, sonda bolǵan dıplomattardy atyp tastamaq bolǵan.

Bul rette jergilikti BAQ lańkestik áreket qaı eldiń dıplomatııalyq mıssııasyna qarsy josparlanǵanyn naqtylamaı otyr.

Baký qalasynyń Sabaıl aýdandyq soty Memlekettik qaýipsizdik qyzmeti tergeýshisiniń M.H.Hýseınzadege qatysty aryzyn qarady.

Sot Hýseınzadege qatysty 4 aı merzimge bultartpaý sharasyn taǵaıyndady.

Kúdiktige Ázerbaıjan Qylmystyq kodeksiniń 28, 214.2.3 jáne 28, 214.2.6 baptary boıynsha aıyp taǵyldy.

Izraıldik Ynet basylymynyń jazýynsha, Ázerbaıjannyń arnaıy qyzmeti Izraıl elshiligine lańkestik áreket jasaý áreketiniń aldyn alǵan.

Aqparatqa sáıkes, elshilikke qarý ustap kirmek bolǵan kezde ustalǵan azamat  - Irannyń týmasy.

Buǵan deıin shilde aıynda Ázerbaıjan MQQ elde lańkestik áreket jasamaq bolǵan Aýǵanstannyń 1990 jylǵy azamaty Favzan Musa Handy ustady.