Ázerbaıjanda elektrondy temekige tyıym salynyp, aıyppul engiziledi

ASTANA. KAZINFORM – Ázerbaıjanda elektrondy temekini paıdalaný, ımporttaý, eksporttaý, óndirý, kóterme jáne bólshek saýdada satý, sondaı-aq ótkizý maqsatynda saqtaý úshin aıyppul belgilenedi, dep habarlaıdy Kazinform-niń Ázerbaıjandaǵy menshikti tilshisi. 

Tıisti túzetý Mıllı Medjlıstiń quqyqtyq saıasat jáne memlekettik qurylys komıtetiniń otyrysynda talqylandy.

Zań jobasyna sáıkes, elektrondy temekini jáne olardyń quramdas bólikterin ımporttaý, eksporttaý, óndirý, satý jáne ótkizý maqsatynda saqtaý kezinde ónim tárkilenip, aıyppul salynady.

Aıyppul mólsheri:

jeke tulǵalar úshin — 350-den 500 manatqa deıin (shamamen 200–300 dollar);
laýazymdy tulǵalar úshin — 1 650-den 2 200 manatqa deıin (shamamen 970–1 300 dollar);
zańdy tulǵalar úshin — 4 000-nan 5 000 manatqa deıin (shamamen 2 300–2 900 dollar).

Sonymen qatar, tyıym salynǵan oryndarda, kóshelerde jáne basqa da qoǵamdyq keńistikterde elektrondy temeki qoldanǵany úshin 30 manat (shamamen 18 dollar) kóleminde aıyppul qarastyrylǵan.

Elektrondy temekilerdi ımporttaýǵa, eksporttaýǵa, óndirýge, saqtaýǵa, satýǵa jáne paıdalanýǵa tolyq tyıym 2026 jylǵy 1 sáýirden bastap kúshine enedi dep kútilýde.

Buǵan deıin elde jeke tulǵalar úshin shetelden avtokólik ákelýge shekteý engizý usynylǵan bolatyn. 

Aıta ketelik Qazaqstan Ázerbaıjanǵa týrıster aǵyny boıynsha Ortalyq Azııa elderi arasynda kósh bastap tur.