Ázerbaıjanda elektrondy temekige salynǵan tyıym kúshine endi

ASTANA. KAZINFORM — 1 sáýirden bastap Ázerbaıjanda elektrondy temekilerdiń aınalymy men qoldanylýyna tolyq tyıym salatyn aýqymdy zańnamalyq ózgerister kúshine endi. Bul týraly Kazinform agenttiginiń menshikti tilshisi habarlady.

Ótken jyldyń sońynda qabyldanǵan «Temeki jáne temeki ónimderi týraly» zańǵa engizilgen túzetýlerge sáıkes, elde elektrondy temekiler men olardyń quramdas bólikterin ımporttaýǵa, eksporttaýǵa, óndirýge, sondaı-aq kóterme jáne bólshek saýdada satýǵa resmı túrde tyıym salyndy. Bul sharalar nıkotıni bar ónimderdi qatań baqylaýǵa baǵyttalǵan.

Jańartylǵan zańnamada nıkotın bar ónimder endi temeki ónimderine teńestirildi. ıAǵnı, olarǵa «Temeki ónimderin tutynýdy shekteý týraly» zańdaǵy barlyq talaptar qoldanylady.

Endi elektrondy temekini bilim berý jáne medıtsınalyq mekemelerde, qoǵamdyq tamaqtaný oryndarynda, saýda ortalyqtarynda, kınoteatrlarda, saıabaqtarda, balalar alańdarynda, sondaı-aq qoǵamdyq kólikterde, metroda, lıftilerde jáne turǵyn úılerdiń kireberisterinde paıdalanýǵa tyıym salynady.

Jańa talaptardy buzǵany úshin 30 manat (shamamen 18 dollar) kóleminde aıyppul qarastyrylǵan. Al elektrondy temekilerdi zańsyz ákelý, óndirý nemese satý úshin:

• jeke tulǵalarǵa – 350-den 500 manatqa deıin,

• laýazymdy tulǵalarǵa – 1650-den 2200 manatqa deıin,

• zańdy tulǵalarǵa – 4000-nan 5000 manatqa deıin aıyppul salynady.

Sonymen qatar, zańsyz ónim mindetti túrde tárkilenedi.

Buǵan deıin Ázerbaıjanda elektrondy temekini paıdalaný, ımporttaý, eksporttaý, óndirý, kóterme jáne bólshek saýdada satý, sondaı-aq ótkizý maqsatynda saqtaý úshin aıyppul belgilengenin jazdyq.