Ázerbaıjanda eki lańkestiń kózi joıyldy

BAKÝ. QazAqparat - 27 qazanda Ázerbaıjannyń BAQ-tarynda Memlekettik qaýipsizdik qyzmeti terrorǵa qarsy operatsııa ótkizý kezinde eki lańkestiń kózin joıdy, degen habar taratty.

QazAqparattyń Ázerbaıjandaǵy menshikti tilshisiniń habarlaýynsha, quqyq qorǵaý organdaryna  «elde qarýly top qurylyp, terakti ázirleýde» degen málimet kelip túsken. Tergeý barysynda aqparat rastalyp oǵan qarsy shara qoldanyldy.

Ázerbaıjan azamattary  F.Rýstamov, A.Gýlıev, A.Gıýlmamedov jáne taǵy basqalar eldiń aýmaǵynan tys jerdegi radıkaldy dinı qarýly toptarmen sóz baılasqan. Atalǵan toptardan ǵalamtor arqyly nusqaý boıynsha olar Ázerbaıjanda lańkestik «Kavkaz djamaat» uıymynyń qarýly tobyn qurý, basshysyn taǵaıyndaý sekildi jumystarǵa kirisken. Olar bopsalaý arqyly túrli tulǵalardan qarjy jınaǵan, shabýyl jasaıtyn adamdardyń izine túsip ańdyǵan. Respýblıka turǵyndary arasynda dúrbeleń týdyratyn top músheleriniń mindetteri bólip berilgen.

26-27 qazanda eldiń túrli aýdandarynda  júrgizilgen keshendi is-sharalar barysynda qarýly qarsylyq kórsetken A.Gýlıev pen F.Rýstamovtyń kózi joıyldy.

Taratylǵan málimetke sensek, A.Gýlıev  qoǵamdyq orynda «F-1» qol granatasyn jaryp jibermekke árekettengen, al F.Rýstamov arnaıy qyzmet ókilderine tapanshadan oq jaýdyrǵan. Úshinshi kúdikti qolǵa túsken. Qazir atalǵan oqıǵa boıynsha qylmystyq is qozǵaldy.