Ázerbaıjanda eki qabatty turǵyn úıde jarylys boldy

BAKÝ. QazAqparat – Ázerbaıjan astanasy Baký qalasyna jaqyn Hyrdalan qalasynda jeke úıde jarylys boldy, dep habarlaıdy QazAqparat AZERTADJ agenttigine silteme jasap.

Tótenshe jaǵdaılar mınıstrligi baspasóz qyzmetiniń habarlaýynsha, oqys oqıǵa Nasıba Zeınalova kóshesinde bolǵan.

112 jedel jelisine Absheron aýdanynyń ortalyǵy Hyrdalan qalasynda 27-shi kvartal aýmaǵyndaǵy eki qabatty úıde jarylys bolǵandyǵy týraly aqparat túsken.

Jarylystan keıin úı órtene bastaǵan. Jarylystan jaqyn mańdaǵy ǵımarattardyń áınegi synǵan. Oqıǵa ornyna TJM kúshteri tartyldy.

Ázirge belgilisi, úıindi astynan eki adam – áıel jáne bala qutqaryldy. Úıindi astynda adamdar bolýy múmkin ekenin eskere otyryp, qutqarý is-sharalary jalǵasýda.