Ázerbaıjanda dıametri 28 mm-ge deıin jetetin burshaq jaýdy
ASTANA. KAZINFORM — Ázerbaıjannyń birneshe óńirinde naızaǵaı oınap, burshaq jaýdy, dep habarlaıdy AZERTADJ.
Ázerbaıjannyń Ulttyq gıdrometeorologııalyq qyzmeti 20 maýsym kúni saǵat 22:00-degi naqty aýa raıy týraly aqparat taratty.
Vedomstvo málimetinshe, eldiń birqatar óńirlerinde jańbyrly aýa raıy saqtalǵan. Atap aıtqanda, Naftalan, Shekı, Balaken, Oǵyz jáne Gýsar aýdandarynda naızaǵaı oınap, keı jerlerde jańbyr jaýǵan.
Shamamen saǵat 20:10-da Gazah aýdanynda dıametri 10-12 mm bolatyn burshaq tirkeldi.
Al arada 10 mınýt ótken soń, Agstafa aýdany aýmaǵynda dıametri 25-28 mm-ge jetetin burshaq jaýdy. Mamandardyń málimetinshe, jaýyn-shashyn negizinen dóńgelek pishindi muz túıirshikteri túrinde túsken.
Sınoptıkter el aýmaǵyndaǵy aýa raıy jaǵdaıyn baqylaýdy jalǵastyryp jatyr.
Osyǵan deıin Aqtóbede burshaq jaýyp, úılerdiń shatyryn tesip ketkenin jazǵan bolatynbyz.
