Ázerbaıjanda daýys berý bastaldy
BAKÝ. QazAqparat - Búgin Ázerbaıjannyń barlyq saılaý ýchaskelerinde osy eldiń Konstıtýtsııasyna ózgerister men tolyqtyrýlar engizý boıynsha jalpyhalyqtyq daýys berý sharalary bastaldy.
Osylaısha, «Ázerbaıjan Respýblıkasynyń Konstıtýtsııasyna ózgerister men tolyqtyrýlar engizý týraly» referendým aktisine baılanysty respýblıkada vıtse-prezıdent pen vıtse-prezıdentterdiń laýazymyn engizý, prezıdenttiń ókilettiligin 5 jyldan 7 jylǵa deıin uzartý, sonymen qatar memleket basshysyna Mıllı Medjlısti (parlament) taratý men kezekten tys prezıdent saılaýyn taǵaıyndaý týraly ókilettik berý usynylyp otyr. Buǵan qosa ózgerister prezıdenttik saılaýlar kezinde jas erekshelikterin alyp tastap, parlament saılaýyndaǵy jasqa baılanysty shekteýdi 25-ten 18-ge deıin tómendetýdi qarastyrady.
Ázerbaıjannyń Ortalyq saılaý komıssııasynyń málimetteri boıynsha, referendýmnyń ótkizilýin baıqaý maqsatynda EKPA men ózge de halyqaralyq uıymdardy qosa alǵanda 35 memleketten 117 halyqaralyq baıqaýshy tirkelgen.
Búkil memleket boıynsha, barlyǵy 5 myń 600-den astam saılaý ýchaskeleri uıymdastyrylǵan, ondaǵy daýys berýshiler sany 53 myń adamdy quraıdy. Bul bir saılaý ýchaskesine 10 baıqaýshydan keledi degen sóz. Baıqaýshylardyń arasynda saıası partııalardyń ókilderi men referendým úderisin baıqaýǵa nıet bildirgen qatardaǵy azamattar da bar.
Buǵan qosa, daýys berý sharasyn qysqamerzimdi baqylaý sharasyn uıymdastyrý maqsatynda Qazaqstan Parlamenti Májilisiniń depýtaty Nurlan Dýlatbekov, Túrkitildes memleketterdiń Parlamenttik assambleıasyna kiretin parlament depýtattarynyń halyqaralyq mıssııasyn basqarý úshin Ázirbaıjanǵa keldi. Bul topqa Qyrǵyzstan men Túrkııa parlamentiniń ókilderi de kirdi.
Jumys jospary boıynsha, baıqaýshylar mıssııasy resmı tulǵalarmen, saıası partııalar men qoǵamdyq uıymdardyń ókilderimen kezdesip, jalpy daýys berý jumystarymen tanysady. Sonymen qatar, daýys berý kúni Baký qalasynda ornalasqan saılaý ýchaskelerindegi daýys berý úderisin baıqaıdy.
Dýlatbekovtyń aıtýynsha, «TúrikPA 2010 jyldan beri uıymǵa múshe memleketterdegi jalpyǵa birdeı daýys berý sharalaryn baıqap keledi. Mundaı is-sharalar bizdiń memleketterimizdegi daýys berý jumystaryn odan ári damytýǵa yqpal etedi. Túrik álemindegi demokratııalyq qundylyqtardy nyǵaıtý - bizdiń basty maqsatymyz».
Aıta keteıik, Ázerbaıjan Respýblıkasynyń prezıdenti Ilham Alıev aǵymdaǵy jyldyń 1-shildesinde respýblıka Konstıtýtsııasyna ózgerister men tolyqtyrýlar engizý referendýmy týraly Akt jobasyn Konstıtýtsııalyq sotqa engizýdi tapsyryp, ol maquldanyp, odan soń Memleket basshysy 2016 jyldyń 26 qyrkúıegi kúni referendým ótkizý týraly qujatqa qol qoıdy.
