Ázerbaıjanda birqatar karantın sharalary jeńildedi

BAKÝ. QazAqparat — Ázerbaıjan úkimeti janyndaǵy jedel shtabtyń málimetinshe, erekshe karantındik rejım aıasynda qoldanylatyn shekteýlerdiń taǵy bir bóligin jeńildetý týraly sheshim qabyldandy, dep habarlaıdy QazAqparat menshikti tilshisi.

Sondaı-aq, qazirgi sanıtarlyq-epıdemıologııalyq jaǵdaıǵa qaramastan 18 mamyrdan bastap Baký, Sýmgaıyt, Gıandja, Lıankıaran qalalary men Absheronsk aýdanynda:

- SMS arqyly, icaze.e-gov.az portalyna tirkelý arqyly nemese jumys ornynan anyqtama arqyly úıden shyǵýǵa ruqsat alý júıesi joıylady;

- saıabaqtarǵa jáne demalys oryndaryna barýǵa qoıylǵan shekteý joıylady;

- meıramhanalar, dámhanalar jáne barlyq tamaqtaný oryndary 08:00-18:00 aralyǵynda qyzmet kórsetedi;

Sondaı-aq, 18 mamyrdan bastap Ázerbaıjannyń barlyq aýmaǵynda:

- mýzeıler men kórme zaldarynyń qyzmeti qalpyna keltiriledi;

- 65 jastan asqan adamdarǵa úıden shyǵýǵa salynǵan tyıym kúshin joıady.

Qazirgi ýaqytta erekshe karantın rejımi kezinde elde mynadaı shekteýler qala beredi:

- júk kólikterin qospaǵanda jer jáne áýe qatynasy arqyly elden kirýge jáne shyǵýǵa;

- Baký jáne Sýmgaıyt qalalary men Absheronsk aýdanynan, sondaı-aq Gıandja jáne Lıankıaran qalalarynan shyǵýǵa jáne kirýge;

- basqa qalalar men eldiń basqa aýdandarynan jer jáne áýe qatynasy arqyly jolaýshylar tasymaldaýǵa;

- barlyq bilim berý mekemelerindegi oqý isi;

- jerleý rásimin qospaǵanda dinı qyzmetterdi ótkizýge, zaldarda, palatkalarda as berýge jáne uıymdastyrýǵa;

- toı jasaýǵa;

- mádenı-sporttyq sharalarǵa;

- oıyn-saýyq ortalyqtarynyń jumysyna;

- kınoteatrlar, teatrlar, sport zaldardyń qyzmetine;

- el aýmaǵyndaǵy iri saýda ortalyqtarynyń jumysyna;

- medıtsınalyq mekemelerdegi naýqas týystarǵa barýǵa;

- saýyqtyrý jáne sport qyzmetterin kórsetýge;

- massaj jasaýǵa tyıym salynady.

Avtory Bekbaý Taımanov