Ázerbaıjanda bir kúnde koronavırýs juqtyrǵan 76 adam tirkeldi, bir adam kóz jumdy
NUR-SULTAN. QazAqparat – Ázerbaıjanda koronavırýs juqtyrýdyń 76 jańa oqıǵasy tirkeldi, indetten bir adam qaıtys bolǵan, dep habarlaıdy QazAqparat Trend agenttigine silteme jasap.
Eldiń mınıstrler kabıneti janyndaǵy Jedel shtabtyń habarlaýynsha, koronavırýs juqtyrǵan 1953 jylǵy azamattyń densaýlyǵyn jaqsartýǵa baǵyttalǵan sharalar nátıjesin bermegen. Qazir onyń otbasy músheleri, sondaı-aq, ol baılanysta bolǵan basqa adamdar anyqtalýda.
Elde indetke shaldyǵýdyń 717 oqıǵasy tirkelgen, sonyń ishinde 44 adam jazylyp, segiz adam kóz jumǵan. Erekshe rejımdegi aýrýhanalarda 665 adam em qabyldap jatyr. Sonyń ishinde 23 adamnyń jaǵdaıy aýyr, 31 adamnyń jaǵdaıy – ortasha aýyr, qalǵandary ózderin qalypty sezinýde.
Aýrý juqtyrý faktisin anyqtaý úshin barlyǵy 53 300 test jasaldy.
