Ázerbaıjanda alǵashqy mamandandyrylǵan júk áýejaıy 2027 jyly iske qosylady
ASTANA. KAZINFORM – Ázerbaıjanda Alıat kentiniń mańynda, Baký halyqaralyq teńiz saýda portynyń janynda salynyp jatqan eldegi alǵashqy mamandandyrylǵan júk áýejaıynyń qurylysy jalǵasyp jatyr. Nysannyń logıstıkalyq múmkindikterin kúsheıtetin Orta dálizdi damytýdyń erekshe mańyzy bar, dep habarlaıdy Kazinform agenttiginiń Bakýdegi menshikti tilshisi.
Jańa ınfraqurylymdyq nysan Kaspıı teńiziniń jaǵalaýynda qalyptasyp jatqan kólik-logıstıkalyq keshenniń bir bóligine aınalyp, eldiń halyqaralyq júk tasymaly salasyndaǵy múmkindikterin keńeıtedi.
Respýblıkanyń qoldanystaǵy áýejaılarynan aıyrmashylyǵy – jańa nysan bastapqyda tek júk áýe qatynasyna qyzmet kórsetý úshin jobalanǵan. Onyń qurylysy 2024 jyldyń naýryz aıynda bastaldy, al áýejaıdy paıdalanýǵa berý 2027 jylǵa josparlanǵan.
Joba Alıat erkin ekonomıkalyq aımaǵynyń aýmaǵynda júzege asyrylyp otyr jáne teńiz, temirjol, avtomobıl jáne áýe baǵyttaryn biriktiretin mýltımodaldy kólik torabynyń bir bóligi bolady. Port ınfraqurylymynyń janynda ornalasýy bolashaq áýejaıdy negizgi eýrazııalyq kólik baǵyttaryna, sonyń ishinde Transkaspıı halyqaralyq kólik baǵytyna (Orta dáliz), sondaı-aq Soltústik-Ońtústik halyqaralyq baǵytyna biriktirýge múmkindik beredi.
Jańa áýejaı kesheniniń aýmaǵy 750 gektardan asady. Birinshi kezeńde termınaldyń ótkizý qabileti jylyna shamamen 500 myń tonna júkti quraıdy, al bolashaqta qýattylyqty jylyna 1,5 mln tonnaǵa deıin arttyrý josparlanǵan.
Áýejaıdyń tehnıkalyq ınfraqurylymy uzyndyǵy 4 shaqyrym bolatyn ushý-qoný jolaǵyn salýdy kózdeıdi, bul alys magıstraldi aýyr júk ushaqtaryn qabyldaýǵa múmkindik beredi. Budan basqa, nysan áýe aılaǵyn kúrdeli meteorologııalyq jaǵdaılarda paıdalanýdy qamtamasyz etetin ICAO IIIB sanaty standartyna sáıkes keledi.
Erkin ekonomıkalyq aımaq ákimshiligi ókilderiniń málimdeýinshe, jańa áýejaı qosylǵan quny joǵary ónimderdi, sonyń ishinde elektronıka, farmatsevtıkalyq ónimder men joǵary tehnologııalyq ónerkásiptik jabdyqtardy tezirek jetkizýdi qamtamasyz etýi tıis. Jańa ınfraqurylym sondaı-aq Alıat ekonomıkalyq aımaǵynda jumys isteıtin kásiporyndardyń eksporttyq múmkindikterin de keńeıtedi dep kútilip otyr.
Aıta keteıik, Quryq portynda «Ázerbaıjan-Qazaqstan teńiz kabeldik júıesi» jobasynyń jańa kezeńi bastaldy.
