Ázerbaıjanda 5 shildege deıin karantın sharalary kúsheıtiledi

BAKÝ. QazAqparat – Búgin saǵat 00:00-den bastap Ázerbaıjanda karantın sharalary kúsheıtilmek. Bul týraly QazAqparat Trend agenttigine silteme jasap habarlaıdy.

Ázerbaıjanda koronavırýs ınfektsııasynyń jyldam taralýyn aldyn alý maqsatynda Baký, Sýmgaıyt, Gıandja, Lıankıaran, Evlah, Masally, Djalılabad qalalary jáne Absheron aýdanynda arnaıy karantın rejımi kúshine enedi.

Ázerbaıjannyń mınıstrler kabıneti janyndaǵy Jedel shtabtyń habarlaýynsha, tıisti qaýlyǵa 19 maýsym kúni eldiń Premer-Mınıstri Álı Asadov qol qoıǵan.

Arnaıy karantın rejımi aıasynda búgingi kúnnen bastap 5 shildege deıin Ázerbaıjanda iri saýda ortalyqtary (azyq-túlik dúkenderi men dárihanalardy eseptemegende), qoǵamdyq tamaqtaný nysandary, murajaılar men kórme zaldary, shashtaraz, sulýlyq salondary, bilim mekemeleri (onlaın-emtıhan, baıqaý, ıntervıýdi sanamaǵanda) jabylyp, ashyq aýada sporttyq sharalar men oıyndar ótkizý tyıym salynady.

Adamdar turǵylyqty jerinen tek qandaı da bir kestemen nemese jedel medıtsınalyq járdem alý maqsatynda, azyq-túlik jáne qajetti zattar men dári-dármek satyp alý jáne bank, poshta jáne basqa qyzmet túrlerin paıdalaný, jaqyn týystarynyń jerleý rásimine qatysý úshin ǵana shyǵa alatyn bolady.