Ázerbaıjanda 22 myńnan astam adamǵa raqymshylyq jasaldy
ASTANA.KAZINFORM - Ázerbaıjanda sońǵy onjyldyqtardaǵy eń aýqymdy amnıstııa aktileriniń biri tolyq júzege asyryldy. Oǵan 22 935 adam qamtyldy. Bul týraly Kazinform agenttiginiń menshikti tilshisi Ázerbaıjan Ádilet mınıstrliginiń baspasóz qyzmetine silteme jasap habarlady.
Amnıstııa «Konstıtýtsııa jáne egemendik jyly» aıasynda jarııalanyp, Ilham Álıevtiń bastamasymen parlament qabyldaǵan sheshim negizinde júzege asyryldy.
Qujatty oryndaý jumystary tórt aı ishinde aıaqtaldy. Oǵan memlekettik organdarmen qatar úkimettik emes uıymdar, buqaralyq aqparat quraldary jáne azamattyq qoǵam ókilderi qatysty.
Qamtylǵan adamdar sany boıynsha bul 1996 jyldan beri elde júzege asqan 13-amnıstııa bolyp, osy kezeńdegi eń iri akt retinde tirkeldi.
Resmı málimetke sáıkes, amnıstııa nátıjesinde 5 348 adam bas bostandyǵynan aıyrý jazasynan bosatyldy. 3 555 sottalǵannyń jaza merzimi alty aıǵa qysqartyldy. Taǵy 9 714 adam bas bostandyǵynan aıyrýmen baılanysty emes jazalardan bosatyldy.
Ádilet mınıstrliginde bul sheshim qylmystyq-atqarý saıasatyn izgilendirýge jáne amnıstııaǵa ilikken azamattardyń qoǵamǵa beıimdelýine qoldaý kórsetýge baǵyttalǵanyn atap ótti.
Osyǵan deıin Shymkent pen Túrkistan oblysy boıynsha qylmystyq-atqarý júıesi departamentine qarasty mekemelerde jazasyn ótep jatqan 675 sottalǵannyń jeke isteri zerdelenip, raqymshylyqqa ilikkeni týraly jazdyq.
