Ázerbaıjanda 16 jasqa tolmaǵan balalarǵa áleýmettik jelige tirkelýge tyıym salyndy
ASTANA. KAZINFORM - Ázerbaıjanda balalardyń tsıfrlyq keńistiktegi qaýipsizdigin kúsheıtýge baǵyttalǵan jańa zań qabyldandy. Bul týraly Kazinform agenttiginiń Bakýdegi menshikti tilshisi ara.az portalyna silteme jasap habarlady.
Ázerbaıjan Respýblıkasy Mıllı Medjlısi maquldaǵan ózgeristerge sáıkes, 16 jasqa tolmaǵan balalarǵa áleýmettik jelilerde akkaýnt ashýǵa tyıym salynady.
Zań resmı jarııalanǵan kúnnen bastap 12 aı ótken soń kúshine enedi.
Qujatqa sáıkes, paıdalanýshylar áleýmettik jelige tirkelgen kezde mindetti túrde jasyn rastaýy tıis. Platformalar muny telefon nómiri, elektrondyq poshta nemese bank derekteri sııaqty elektrondyq sáıkestendirý quraldary arqyly tekseredi.
Al 16 men 18 jas aralyǵyndaǵy jasóspirimder áleýmettik jelige tek ata-anasynyń nemese zańdy ókiliniń kelisimimen tirkele alady. Sonymen qatar ata-analarǵa balanyń platformany paıdalanýyn, ınternette ótkizetin ýaqytyn jáne qaýipsizdik baptaýlaryn baqylaýǵa múmkindik beretin quraldar usynylady.
Zańda kámeletke tolmaǵandardyń jeke derekterin qorǵaýǵa erekshe talap qoıylǵan. Jınalǵan aqparat kommertsııalyq maqsatta paıdalanylmaıdy, úshinshi tulǵalarǵa berilmeıdi jáne tekserý aıaqtalǵannan keıin birden joıylýy tıis.
Zań talaptaryn buzǵandarǵa iri kólemde aıyppul salynady. Laýazymdy tulǵalar úshin aıyppul mólsheri 3,5 myńnan 5,9 myń AQSh dollaryna deıin, al zańdy tulǵalar úshin 8,8 myńnan 29,4 myń AQSh dollaryna deıin belgilengen.
Eger talaptar júıeli túrde buzylsa, áleýmettik platformalarǵa qatysty ınternet-trafıkti shekteý sııaqty qosymsha sharalar qoldanylýy múmkin.
Al iri provaıderlerge salynatyn qosymsha aıyppul kólemi 59 myńnan 176 myń AQSh dollaryna deıin jetedi.
Osyǵan deıin Ázerbaıjan mektepterinde sabaq kezinde telefon paıdalanýǵa tyıym salynatyny týraly jazdyq.
