Ázerbaıjan jasyl energetıkanyń arqasynda jyl saıyn 1,5 mlrd tekshe metr gaz únemdeıdi
ASTANA. KAZINFORM — Ázerbaıjanǵa energetıka júıesin jańǵyrtý jáne jańartylatyn energııa kózderi negizinde jumys isteıtin jańa qýattylyqty biriktirý úshin shamamen 500 mln dollar ınvestıtsııa qajet bolady, dep habarlaıdy Kazinform agenttiginiń Bakýdegi menshikti tilshisi.
Eldiń Energetıka mınıstriniń orynbasary Elnur Soltanov bul týraly Technovation Baku forýmynda sóılegen sózinde málimdedi. Onyń aıtýynsha, 2027 jylǵa qaraı Ázerbaıjandaǵy jańartylatyn energııa kózderiniń ornatylǵan qýaty 2 gıgavatqa jetedi.
— Osy 2 GVt jańartylatyn energııa kózderin elektr jelisine biriktirý úshin aıtarlyqtaı ınvestıtsııa qajet — shamamen 500 mln dollar, — dep atap ótti mınıstrdiń orynbasary.
Ol elde jańa jasyl generatsııalaý qondyrǵylaryn iske qosýmen qatar qoldanystaǵy energetıkalyq ınfraqurylymdy keń aýqymdy jańǵyrtý júrgizilip jatqanyn atap ótti. Atap aıtqanda, Ázerbaıjannyń qýaty 2,4 GVt eń iri Mıngıachevır elektr stantsııasynda eskirgen gaz týrbınalary zamanaýı qondyrǵylarmen aýystyryldy.
E.Soltanovtyń habarlaýynsha, jańartylatyn energııa kózderi jobalaryn iske asyrý jáne energetıkalyq nysandardy jańǵyrtý Ázerbaıjanǵa jylyna shamamen 1,5 mrd tekshe metr tabıǵı gazdy únemdeýge múmkindik beredi.
— Belgili bir maǵynada bul jańa «Absheron» gaz ken ornynyń ashylýymen teń, — dedi ol.
Ol sondaı-aq jobanyń eldiń energetıkalyq qaýipsizdigi úshin strategııalyq mańyzdylyǵyn atap ótti.
Vıtse-mınıstrdiń aıtýynsha, jańartylatyn energııa kózderin damytý tek ekologııalyq qana emes, sonymen qatar aıtarlyqtaı ekonomıkalyq áserge ıe. Bosatylǵan tabıǵı gaz kólemin eń aldymen eýropalyq naryqtarǵa eksporttaýǵa bolady, bul ulttyq ekonomıka úshin valıýta túsimderin arttyrady.
— Tabıǵı gazdyń eksporttyq quny joǵary. Ony eýropalyq naryqtarǵa joǵary baǵamen jetkizýge, al alynǵan kiristi ulttyq ekonomıkaǵa qaıtarýǵa bolady, — dep atap ótti Soltanov.
Osyǵan deıin Ázerbaıjan Eýropaǵa gaz eksportyn 56%-ǵa arttyrǵanyn habarladyq.
