Ázerbaıjan vızasyz kiretin elder tizimin keńeıtedi
ASTANA.KAZINFORM - Ázerbaıjan týrısterdi yntalandyrý maqsatynda azamattaryna vızasyz kirý ruqsaty beriletin maqsatty týrıstik elder sanyn 34-ke deıin arttyrýdy josparlap otyr, dep habarlaıdy agenttiktiń Bakýdegi tilshisi.
Bul shara Ázerbaıjan Prezıdenti Ilham Álıevtiń 20 tamyzdaǵy jarlyǵymen bekitilgen Ázerbaıjan Respýblıkasynda týrızmdi damytýdyń 2026-2030 jyldarǵa arnalǵan memlekettik baǵdarlamasynyń is-sharalar josparynda kózdelgen.
Qujatqa sáıkes, baǵdarlamada turaqty tólqujaty bar maqsatty týrıstik elderdiń azamattary úshin vızasyz rejımdi birjaqty nemese ózara qoldaný úshin qajetti ishki rásimderdi engizý josparlanǵan.
Baǵdarlamanyń maqsaty - 28 maqsatty týrıstik eldiń azamattary úshin vızasyz kirýdi qamtamasyz etý, sondaı-aq bul kórsetkishti 34-ke deıin arttyrý. Bul sharany 2026 jáne 2030 jyldar aralyǵynda júzege asyrý josparlanǵan.
Sonymen qatar, baǵdarlamada Ázerbaıjannyń týrıstik áleýetin halyqaralyq deńgeıde nasıhattaý kózdelgen. Osy maqsatta halyqaralyq medıa men tsıfrlyq platformalardy paıdalaný josparlanǵan.
Sonymen qatar, baǵdarlama týrıstik maqsattaǵy elektrondy vızalardy berý rásimderin jeńildetýdi, azamattary elektrondyq vıza ala alatyn elderdiń tizimin keńeıtýdi jáne ASAN Visa júıesiniń tehnıkalyq múmkindikterin jaqsartýdy kózdeıdi.
Buǵan deıin Qazaqstan AQSh týrısteri úshin qaýip deńgeıi tómen elder qataryna endi.
