Ázerbaıjan, Túrikmenstan men Ózbekstan yntymaqtastyqtyń jańa úlgisine kóshti

ASTANA. KAZINFORM - Túrikmenstannyń batysyndaǵy Túrikmenbashy qalasynda Ázerbaıjan Prezıdenti Ilham Alıev, Túrikmenstan Halyq Maslahatynyń tóraǵasy Gýrbangýly Berdymuhamedov jáne Ózbekstan Prezıdenti Shavkat Mırzıeevtiń qatysýymen joǵary deńgeıde kezdesý ótti, dep habarlaıdy Kazinform agenttiginiń menshikti tilshisi.

Kezdesý sheńberinde transport, energetıka, logıstıka, gýmanıtarlyq jáne mádenıet salalarynda yntymaqtastyqty damytýǵa baǵyttalǵan birqatar ekijaqty jáne kópjaqty qujattarǵa qol qoıý rásimi ótti. Basty nazar turaqty damý, tabıǵı resýrstardy tıimdi paıdalaný jáne ózara saýdany ulǵaıtý máselelerine aýdaryldy.

Ázerbaıjan Prezıdenti Ilham Alıev úsh eldiń óńirdiń bolashaǵy úshin tıimdi jumys isteýine múkindik beretin yntymaqtastyqtyń úshjaqty formaty qurylatynyn málim etti.

-Biz qurmet pen tatý kórshi ustanymyna negizdelgen yntymaqtastyqtyń jańa úlgisin quryp jatyrmyz,-dedi ol sóılegen sózinde.

Túrikmenstan Halk Maslahatynyń tóraǵasy Gýrbangýly Berdymuhamedov pen Ózbekstan Prezıdenti Shavkat Mırzıeev búgingi kezdesýdiń jan-jaqty yntymaqtastyqqa jańa serpin beretinine senim bildirdi.

Kezdesý barysynda mádenı jáne gýmanıtarlyq bastamalar da nazardan tys qalǵan joq. Memleket basshylary bilim, ǵylym jáne týrızm salalary boıynsha memleketaralyq deńgeıde tájirıbe almasý isin jandandyrý qajettigin aıtty.

Іs-shara aıasynda ózara ortaq maqsattar men yntymaqtastyqtyń baǵyttary aıqyndalǵan Birlesken deklaratsııaǵa qol qoıyldy. Qujatta kólik baǵyttaryn damytyp, energetıkalyq qaýipsizdikti kúsheıtý jáne gýmanıtarlyq baılanystardy keńeıtýdiń mańyzdylyǵy aıtyldy.

Osyǵan deıin biz Ilham Álıev Gýrbangýly Berdimuhamedovke sáıgúlik syılaǵany týraly jazdyq.