Ázerbaıjan Túrki memleketteri uıymynyń hatshylyǵyna 2 mln dollar bóldi
ASTANA. KAZINFORM – Ázerbaıjan prezıdenti Ilham Álıev Bishkektegi Túrki memleketteri uıymy XI Sammıtiniń otyrysynda sóılegen sózinde TMU Hatshylyǵyna 2 mln dollar jáne Aqsaqaldar keńesine 100 myń dollar kóleminde qarjylaı kómek bóletinin málimdedi, dep habarlaıdy Kazinform agenttiginiń menshikti tilshisi.
Ilham Álıev atap ótkendeı, Túrki memleketteri uıymynyń qazirgi bıýdjeti alǵa qoıǵan maqsattarǵa jetý úshin jetkiliksiz.
«Ázerbaıjannyń Túrki memleketteri uıymynyń Hatshylyǵyna 2 mln dollar jáne Aqsaqaldar keńesine 100 myń dollar kóleminde qarjylaı qoldaý kórsetýi uıymnyń áleýetin odan ári nyǵaıtady dep úmittenemin», - dedi ol.
Onyń aıtýynsha, sońǵy ýaqytta Shyǵys-Batys kólik dálizi boıynsha Ázerbaıjan aýmaǵy arqyly tasymaldaý burynǵydan da artqan.
«Ázerbaıjan bizdiń elimiz arqyly Ortalyq Azııa elderin Túrkııamen baılanystyratyn bul dálizdiń ótkizý qabiletin arttyrý úshin ınvestıtsııa kólemin arttyryp otyr. 2024 jyldyń qańtar-qyrkúıek aılarynda 2023 jyldyń sáıkes kezeńimen salystyrǵanda múshe memleketter men baqylaýshy memleketter arasyndaǵy tranzıttik júk tasymaly 15 paıyzǵa derlik ósti. Qazirgi ýaqytta Orta dálizdi tsıfrlandyrý jáne saýdany jeńildetý boıynsha birqatar jobalar júzege asyrylyp otyr. Bul logıstıkanyń tıimdiligin arttyrýǵa jáne shyǵyndardy azaıtýǵa múmkindik beredi», - dedi Ilham Álıev.
Eske sala ketsek, 6 qarashada Bishkekte Túrki memleketteri uıymynyń kezekti XI sammıti «Túrki álemin nyǵaıtý: Ekonomıkalyq ıntegratsııa, turaqty damý, tsıfrlyq bolashaq jáne barlyǵy úshin qaýipsizdik» taqyrybymen ótip jatyr. Onyń jumysyna uıymǵa múshe bes memleket – Qazaqstan, Ázerbaıjan, Qyrǵyzstan, Túrkııa jáne Ózbekstan basshylary, sondaı-aq baqylaýshy el Majarstannyń basshysy qatysty.
Buǵan deıin habarlanǵandaı, Qazaqstan Respýblıkasynyń Prezıdenti Qasym-Jomart Toqaev Túrki memleketteri uıymynyń sammıtinde sóılegen sózinde Qazaqstannyń bırjadan tys keńistiktegi tóraǵalyǵynyń qorytyndysyn shyǵarǵan bolatyn.
Túrki memleketteri uıymynyń XI sammıtinde 8 qujatqa qol qoıyldy. Uıymǵa tóraǵalyq etý Qazaqstannan Qyrǵyzstanǵa ótti.
Bishkekte ótken Túrki memleketteri uıymynyń XI sammıtinde sóz sóılegen Qyrǵyzstan prezıdenti Sadyr Japarov túrki tildes halyqtar kitaphanasyn qurýdy usyndy.
Bishkek 2025 jyly túrki áleminiń tsıfrlyq astanasy bolady.
