Ázerbaıjan týraly kitap qazaq tilinde jaryq kórdi

ASTANA. QazAqparat - Beıbitshilik jáne kelisim saraıynda «Ázerbaıjannyń energetıkalyq saıasaty» kitabynyń tusaýkeseri ótti, dep habarlaıdy «QazAqparat» HAA tilshisi.

«Búgin taǵy bir kitaptyń tanystyrylymy boldy. Onyń avtory Ázerbaıjan Prezıdentiniń kómekshisi, professor Álı  Ǵasanov. Bul eńbektiń bizdiń elderimiz úshin mańyzdylyǵy men mánin aıtyp ótkim keledi. Kitaptyń bolashaq aımaqtanýshylar men geosaıasat, geoekonomıkamen  aınalysatyn mamandar úshin taptyrmas kómekshi qural bolatyny sózsiz. Oqýlyqta Ázerbaıjannyń sońǵy 20 jyldaǵy saıası jáne ekonomıkalyq strategııalary ashyq jazylǵan», - dedi Ázerbaıjan Respýblıkasynyń Qazaqstandaǵy Tótenshe jáne Ókiletti Elshisi Rashad Mammadov.

Elshiniń aıtýynsha, jeltoqsan aıynyń birinshi on kúndiginen bastap Ál-Farabı atyndaǵy Qazaq ulttyq ýnıversıtetinde Ázerbaıjan mádenıetimen tanystyratyn Qazaqstandaǵy úshinshi ortalyq ashylady. Onda jas mamandar men ǵalymdar atalǵan el týraly aqparattarmen qazaq tilinde tanysý múmkindigine ıe bolmaq.