Ázerbaıjan SІM basshysy Qazaqstanǵa beıbitshilik protsesin ilgeriletýdegi qoldaýy úshin alǵys aıtty
ALMATY. KAZINFORM – 10 mamyr kúni Almatyda Ázerbaıjan men Armenııa respýblıkasynyń syrtqy ister mınıstrleri Djeıhýn Baıramov pen Ararat Mırzoıan jumys sapary barysynda Qazaqstan Premer-Mınıstriniń orynbasary – Syrtqy ister mınıstri Murat Nurtileýmen kezdesti.
Kezdesý barysynda taraptar qazaq-ázerbaıjan strategııalyq áriptestigi men odaqtastyǵyn odan ári nyǵaıtý máselelerin talqylady, sondaı-aq óńirdegi aǵymdaǵy ahýal boıynsha pikir almasty.
Ázerbaıjan tarapy Ázirbaıjannyń Ortalyq Azııa elderimen, onyń ishinde Qazaqstanmen sońǵy kezde keńeıip kele jatqan qarym-qatynasty joǵary baǵalaıtynyn jetkizdi.
Sondaı -aq ekonomıka, saýda, ınvestıtsııa, energetıkalyq qaýipsizdik, kólik jáne kommýnıkatsııa salalary boıynsha ekijaqty áriptestikpen qatar óńirlik jáne halyqaralyq platformalardaǵy, atap aıtqanda túrki memleketteriniń uıymy aıasyndaǵy yntymaqtastyqtyń keń keleshegi bar ekeni atap ótildi.
«Qazirgi jaǵdaı týraly aıta kele, mınıstr Djeıhýn Baıramov qazaqstandyq tarapqa Ázerbaıjan men Armenııa arasyndaǵy ekijaqty beıbitshilik protsesin ilgeriletý baǵytyndaǵy qoldaýy men belsendiligi úshin alǵysyn aıtty. Búgingi kelissózder osy protseske óz úlesin qosatynyna senim bildirildi», - delingen Ázerbaıjan SІM málimdemesinde.
Eki eldiń syrtqy ister mınıstrleri ózara múddeli basqa da máseleler boıynsha pikir almasty.
Buǵan deıin Ázerbaıjan men Armenııa respýblıkasynyń syrtqy ister mınıstrleri Djeıhýn Baıramov pen Ararat Mırzoıan arasyndaǵy kelissóz aıaqtalǵany týraly jazǵan edik.
Eske salaıyq, 10 mamyr kúni Ázerbaıjan men Armenııanyń cyrtqy ister mınıstrleri kelissóz júrgizýge Almatyǵa kelgen bolatyn.
Aıta keteıik, sáýir aıynda Erevanda ótken kelissózder barysynda Qazaqstan Prezıdenti Qasym-Jomart Toqaev pen Armenııa Premer-mınıstri Nıkol Pashınıan Ońtústik Kavkazda turaqtylyq pen qaýipsizdikti qamtamasyz etý máselesine aıryqsha nazar aýdarǵan bolatyn.
Sondaı-aq Memleket basshysy, bul kezdesý ázerbaıjan-armıan ýaǵdalastyǵynyń naqty júzege asýyna jol ashyp, jýyq arada Ońtústik Kavkazda turaqty ári uzaqmerzimdi beıbitshiliktiń ornaýyna yqpal etetinin aıtqan edi.
Buǵan deıin Qazaqstan kelissóz ótkizý úshin alań usyný arqyly járdem kórsetýge daıyn ekenin málimdegen.
