Ázerbaıjan Sırııany qalpyna keltirýge qatysýǵa daıyn – Ilham Álıev

ASTANA. KAZINFORM - Ázerbaıjan prezıdenti Ilham Álıev Antalııada ótip jatqan 4-shi dıplomatııalyq forým aıasynda Sırııanyń ótpeli kezeńdegi prezıdenti Ahmed ash-Sharaamen kezdesti, dep habarlaıdy Ázerbaıjan prezıdentiniń resmı saıty.

Kezdesýde Ilham Álıev Sırııadaǵy ózgeristerge qanaǵattanǵanyn aıtyp, Ahmed ash-Sharaany quttyqtady. Sondaı-aq ol Ázerbaıjan eldegi turaqtylyqty nyǵaıtý úshin Sırııany qalpyna keltirýge qatysýǵa daıyn ekenin atap ótti.

Ahmed ash-Sharaa Ilham Álıevke kórsetken qoldaýy úshin alǵysyn bildirdi. Sırııanyń ótpeli kezeńdegi prezıdenti Ázerbaıjannyń óz eline energetıka, ınfraqurylym jáne qaýipsizdik salalary boıynsha kóp kómegin tıgizip jatqanyn aıtty. 

Ahmed ash-Sharaa Sırııadaǵy turaqtylyqty qalpyna keltirý úshin qoldan kelgenniń bárin jasap jatqanyn tilge tıek ete kele, syrtqy faktorlardyń yqpalyna alańdaýshylyq bildiretinin jasyrmady. 

Kelissózder barysynda kóshbasshylar Ázerbaıjan-Sırııa-Túrkııa úshjaqty yntymaqtastyq formatyn damytý máselelesin talqylady. 

Eki eldiń joǵary deńgeıdegi resmı delegatsııasy men isker top ókilderiniń ózara saparlaryn júzege asyrý týraly ýaǵdalastyqqa qol jetkizildi. 

Jeltoqsan aıynda Ázerbaıjan Syrtqy ister mınıstrligi bul eldiń Sırııadaǵy gýmanıtarlyq máselelerdi sheshýge úles qosýǵa daıyn ekenin málimdegen. 

Birer kún buryn Netanıahý keńsesi Sırııadaǵy jaǵymsyz oqıǵalardyń aldyn alýǵa baǵyttalǵan deeskalatsııa mehanızmin talqylaý úshin Túrkııa men Izraıl delegatsııalarynyń Ázerbaıjanda kezdesýin rastady. 

Eske sala keteıik, buǵan deıin Ázerbaıjannyń Qytaımen qorǵanys salasy boıynsha dıalogty bastaǵanyn habarlaǵan bolatynbyz.