Ázerbaıjan Sırııadaǵy gýmanıtarlyq máselelerdi sheshýge úles qosýǵa daıyn

ASTANA. KAZINFORM — Ázerbaıjan Sırııadaǵy jaǵdaıdy baqylap, Túrkııamen keńesip otyr, dep habarlaıdy Kazinform agenttiginiń menshikti tilshisi.

Bul týraly eldiń Syrtqy ister mınıstrligi taratqan málimdemede aıtylǵan. Qujatta Sırııada Bashar Asad rejımi qulaǵannan keıin elde beıbitshilik pen turaqtylyqty qalpyna keltirý jáne azamattyq qaqtyǵysty toqtatý qajet ekeni anyq kórsetilgen. Ázerbaıjan taǵy da Sırııanyń aýmaqtyq tutastyǵy men egemendigin qoldaıtynyn bildirip, máseleni Sırııa halqynyń erkine saı, sondaı-aq el ishindegi saıası dıalog arqyly sheshýge úmittenedi.

— Ázerbaıjan Respýblıkasy baýyrlas Túrkııa Respýblıkasymen jáne basqa da pikirlestermen birge Sırııa halqy tap bolǵan gýmanıtarlyq problemalardy jeńýge úles qosýǵa daıyn, — delingen habarlamada.

Ázerbaıjan 2020 jyly bastalǵan Ázerbaıjan azamattaryn Túrkııa arqyly Sırııadan elge qaıtarý protsesin jalǵastyrady.

— Ázerbaıjan Sırııadaǵy jaǵdaı turaqtalǵannan keıin elder arasyndaǵy ekijaqty qarym-qatynas qalpyna keltirilip, ózara dostyq pen seriktestik negizinde yntymaqtastyq damıdy dep úmittenedi, — delingen qujatta.

Ázerbaıjan aqparat quraldarynyń habarlaýynsha, Ázerbaıjan prezıdenti Ilham Álıev pen Túrkııa prezıdenti Rejep Taıyp Erdoǵan jeltoqsannyń 10-y kúni telefon arqyly sóılesip, Sırııadaǵy Bashar Asad rejımi qulaǵannan keıingi qazirgi jaǵdaıdy talqylady.

Sırııadaǵy jaǵdaı men onyń bolashaǵy halyqaralyq arenada mańyzdy taqyryp bolyp qala beredi. Túrkııa Bashar Asad Reseıge ketkennen keıin Sırııa úkimetindegi mańyzdy oryndardy kim ıelene alatynyn talqylap jatyr.

Eske salsaq, osyǵan deıin Izraıl Sırııa teńiz flotyn joıǵanyn jarııalady.