Ázerbaıjan Serbııaǵa 444 mln tekshe metrden astam gaz eksporttady
ASTANA. KAZINFORM — Ázerbaıjannyń energetıka mınıstri Parvız Shahbazov pen Serbııanyń taý-ken ónerkásibi jáne energetıka mınıstri Dýbravka Djedovıch-Handanovıch arasynda kezdesý ótti, dep habarlaıdy AZERTADJ.
Mınıstrlik málimetinshe, kezdesý barysynda Ázerbaıjan men Serbııa basshylary arasyndaǵy joǵary deńgeıdegi saıası qarym-qatynastyń strategııalyq áriptestikti nyǵaıtýdaǵy mańyzdy róli atap ótildi.
Sondaı-aq bıyl aqpanda Belgradta eki el prezıdentteriniń teń tóraǵalyǵymen ótken Strategııalyq áriptestik keńesiniń alǵashqy otyrysy jáne gaztýrbınalyq elektr stantsııasy boıynsha úkimetaralyq kelisim energetıka salasyndaǵy yntymaqtastyqtyń damýyna serpin bergeni aıtyldy. Budan bólek, naýryz aıynda ótken energetıka salasyndaǵy yntymaqtastyq jónindegi birlesken jumys tobynyń alǵashqy otyrysy da sóz boldy.
Kezdesýde munaı-gaz jáne energetıkalyq ınfraqurylym, elektr energııasyn óndirý, energııa tıimdiligi, jańartylatyn energııa kózderi men jylýmen qamtý salalaryndaǵy yntymaqtastyq máseleleri talqylandy. Eki jyldan astam ýaqyt ishinde Ázerbaıjannan Serbııaǵa 444,6 mln tekshe metr gaz eksporttalǵany habarlandy. Sonymen qatar Serbııadaǵy gaz elektr stantsııasy jobasyn iske asyrý barysy qaraldy.
Taraptar «Kaspıı – Qara teńiz – Eýropa» jasyl energetıkalyq dálizi jobasy aıasyndaǵy yntymaqtastyq múmkindikterin de baǵalady.
Kezdesý barysynda serb tarapy «Baký energetıkalyq aptalyǵy» aıasynda ótetin is-sharalarǵa keńeıtilgen quramda qatysýǵa shaqyryldy.
Osydan buryn Ázerbaıjan Iranǵa gýmanıtarlyq kómek jibergenin jazǵanbyz.