Ázerbaıjan sarapshylary Qazaqstan Prezıdenti Qasym-Jomart Toqaevtyń jetistikterin atady

BAKÝ. QazAqparat – Qasym-Jomart Toqaev prezıdenttiginiń jetistigi retinde onyń qoǵam aldyndaǵy ashyqtyǵyn, kún tártibindegi ózekti máselelerge nazar aýdaratyndyǵyn atap ótýge bolady. Bul pikirdi «QazAqparat» tilshisimen áńgime barysynda ázerbaıjandyq saıasattanýshy Tofık Abbasov aıtty.

«Prezıdent Toqaev erekshe sheshimder qabyldaýǵa qaýqarly ótkir dıplomatııanyń sheberi. Ol tepe-teńdik úrdisin óte sheber ustanady. Bul óz kezeginde qoǵamdaǵy teńgerimdi qoldaýǵa, bılik tarmaqtary arasyndaǵy qatynastardy saýatty retteýge, sondaı-aq otandastarynyń ınnovatsııalyq áleýetin ashý úshin qajetti berekeli tirektiń qalyptasýyn yntalandyrýǵa múmkindik beredi», - dedi T. Abbasov.

Sarapshynyń sózine qaraǵanda, bir jylda Prezıdent Toqaev ulttyq damýdyń strategııalyq ári taktıkalyq maqsattaryn naqty biletinin el halqyna dáleldeı aldy. Osy oraıda ulttyq qoǵamnyń talqysyna taǵdyrsheshti problemalardy shyǵarýy, ujymdyq talqylaýlar júrgizý men ashyqtyq jaǵdaıynda sheshimder qabyldaýdy nazarǵa ala otyryp, Memleket basshysynyń azamattardyń quqyǵy men bostandyǵyn qamtamasyz etýge qanshalyqty múddeli ekenin baıqaýǵa bolady.

Tofık Abbasovtyń atap ótýinshe, bılik pen halyq arasyndaǵy senim faktory únemi mańyzdy róldi oınaıdy.

Óz kezeginde Halyqaralyq qatynastar analızi ortalyǵynyń basqarma tóraǵasy Farıd Shafıev el Prezıdenti retinde Q. Toqaevty saılaý sátinen bastap Qazaqstanda ótken jyldaǵy negizgi jetistik memlekettegi saıası turaqtylyq ekenin qadap aıtty. Respýblıka turǵan geosaıası jaǵdaıdy eskere otyryp, turaqtylyqty qamtamasyz etý el úshin, sondaı-aq barsha óńir úshin asa mańyzdy.

Kavkaz tarıhy ortalyǵynyń dırektory Rızvan Gýseınov Qazaqstan Prezıdenti laýazymynda Qasym-Jomart Toqaev eldiń barlyq óńirlerine baryp, kásiporyndardyń, oqý oryndarynyń, aýyl sharýashylyǵy keshenderi men basqa da nysandardyń jumysymen tanysqanyn eske saldy.

Onyń paıymynsha, QR Prezıdentiniń tujyrymy men sheshimderi óte salmaqty ári jeke tájirıbesine súıene otyryp jasalýda.

«Ulttyq qoǵamdyq senim keńesiniń úshinshi otyrysynda aldaǵy jyldarǵa belgilengen basymdyqtar qoıyldy, onyń ishinde medıtsınalyq ınfraqurylymdy damytýǵa ekpin jasaldy. Sonymen qatar, bilim berý júıesine, ǵylymǵa, adamı kapıtaldy damytýǵa qatysty mańyzdy máseleler kóterildi», - dedi sarapshy.