Ázerbaıjan Reseı azamattarynyń elge kirý erejelerin qatańdatpaq
ASTANA. KAZINFORM — Tıisti qaýlyǵa el premer-mınıstri Álı Asadov qol qoıdy, dep habarlaıdy Kazinform menshikti tilshisi.
— Reseı Federatsııasynyń azamattary, sondaı-aq Reseı Federatsııasynda turaqty turatyn, biraq Reseı azamattyǵy joq adamdar bir kúntizbelik jyl ishinde Ázerbaıjanda 90 kúnnen aspaıtyn vızasyz júre alady, — delingen vedomstvo saıtynda jarııalanǵan qujatta.
Mınıstrler kabınetiniń qaýlysy 2025 jyldyń 1 qańtarynan bastap kúshine enedi.
Buǵan deıin reseılikter Ázerbaıjanda jylyna 180 kúnge deıin vızasyz júre alatyn.
Bir kún buryn Ázerbaıjan SІM baspasóz qyzmetiniń jetekshisi Aıhan Gadjızade Baký reseılik tarap bekitken jańa erejelerge jáne RF-da bolý merzimine qoıylatyn talaptardy kúsheıtýge jaýap retinde aınadaı sharalar qabyldaıtynyn málimdedi.
Eske sala keteıik, buǵan deıin Ázerbaıjan Sırııaǵa gýmanıtarlyq kómek jibergenin jazǵan bolatynbyz.