Ázerbaıjan prezıdenti men Armenııa premeri «Adamzat baýyrlastyǵy» syılyǵymen marapattaldy
ASTANA. KAZINFORM — Birikken Arab Ámirlikteriniń Abý-Dabı qalasynda halyqaralyq sheıh Zaıd atyndaǵy «Adamzat baýyrlastyǵy» syılyǵyn tabys etý saltanaty ótti. Sharaǵa Ázerbaıjan prezıdenti Ilham Álıev pen Armenııa premer-mınıstri Nıkol Pashınıan qatysty, dep habarlaıdy Kazinform agenttiginiń menshikti tilshisi.
Saltanatty jıynda sóılegen Ázerbaıjan prezıdenti Ilham Álıev uzaqqa sozylǵan Ázerbaıjan–Armenııa qaqtyǵysynan keıin taraptar beıbit kezeńge ótkenin atap ótti.
— Biz otyz jyldan astam ýaqyt soǵys jaǵdaıynda boldyq. Búgingi tańda alty aıdan beri beıbit ómir súrip, yntymaqtastyq negizinde qarym-qatynas qurýdy úırenip kelemiz. Uzaq jyldar boıy qarsylasýdan keıin halyqtarymyzdyń bolashaǵy men ál-aýqatyna kóńil bólý múmkindigi paıda bolýy erekshe sezim, — dedi memleket basshysy.
Al Armenııa premer-mınıstri Nıkol Pashınıan syılyqtyń beıbit protsesti moıyndaý retindegi mańyzyn atap ótti.
— Syılyq kóshbasshylarǵa berilgenimen, ol shyn máninde bizdiń halyqtarymyzǵa tıesili. Armıan jáne ázerbaıjan qoǵamdarynyń beıbit bolashaqty qabyldaýǵa daıyn bolýy osy protsesti shyndyqqa aınaldyrady. Bul marapat árbir armıan men árbir ázerbaıjan azamatqa tıesili, — dedi ol.
Saltanatta «Zaıed adamzattyq baýyrlastyq syılyǵynyń» laýreaty, áıelderdiń quqyqtary salasyndaǵy zertteýshi Zarka ıAftalı jáne Palestına uıymy «Taavon» ókili Nabıl Gaddýmı de sóz sóıledi.
Sol kúni Abý-Dabıde Ilham Álıev pen Nıkol Pashınıan kelissóz ótkizdi. Taraptar Vashıngtondaǵy beıbit sammıtte qol jetkizilgen kelisimderdiń júzege asyrylýyndaǵy ilgerileýdi quptap, ekijaqty qarym-qatynasty qalyptastyrý protsesin jalǵastyrýǵa daıyn ekenderin rastady.
Kezdesý barysynda ekijaqty saýdanyń bastalǵany, Ázerbaıjannan Armenııaǵa munaı ónimderin eksporttaýdyń jalǵasýy, sondaı-aq úshinshi elderden Ázerbaıjan aýmaǵy arqyly astyq pen basqa da taýarlardy tranzıtteý týraly sóz boldy. Taraptar óńirde beıbitshilik pen turaqtylyqty nyǵaıtý úshin baılanystardy saqtaýǵa ýaǵdalasty.
Eske salsaq, Ilham Álıev Davos qalasyndaǵy Dúnıejúzilik ekonomıkalyq forýmda Baký men Erevan kópjyldyq qaqtyǵys betin jaýyp, turaqty beıbitshilik ornatý jóninde tarıhı sheshim qabyldaǵanyn aıtqan bolatyn.