Ázerbaıjan Prezıdenti Qazaqstannyń ekijaqty jobalardaǵy strategııalyq rólin atap ótti
ASTANA. KAZINFORM — III Shýsha jahandyq medıaforýmynda sóılegen sózinde Ázerbaıjan Prezıdenti Ilham Álıev Qazaqstan men Ázerbaıjan arasyndaǵy qarym-qatynastyń qarqyndy damyp kele jatqanyn jáne azat etilgen aýmaqtardy qalpyna keltirýden bastap iri kólik, energetıka jáne tsıfrlyq jobalardy júzege asyrýǵa deıingi kóptegen baǵytty qamtıtynyn málimdedi, dep habarlaıdy Kazinform agenttiginiń menshikti tilshisi.
Ilham Álıev Qazaqstan Respýblıkasynyń Prezıdenti Qasym-Jomart Toqaevqa jáne qazaq halqyna Qarabaqty qalpyna keltirýge kórsetken qoldaýy úshin alǵys aıtty.
— Qarabaqty qalpyna keltirýge kórsetken kómegi úshin Qazaqstan Prezıdentine alǵysymyzdy bildiremiz. Qazaqstan Fızýlı qalasynda qazaq halqynyń kórnekti perzenti Qurmanǵazynyń esimi berilgen Balalar shyǵarmashylyq ortalyǵyn salyp berdi. Biz ony Prezıdent Qasym-Jomart Toqaevpen birge ashtyq. Azat etilgen aýmaqtardy qalpyna keltirýge qoldaý kórsetken baýyrlas qazaq halqyna rızashylyǵymyzdy bildiremiz, — dedi Ilham Álıev.
Ázerbaıjan Prezıdenti eki el basshylary arasyndaǵy senimdi jeke qarym-qatynas ekijaqty yntymaqtastyq pen óńirlik ózara is-qımyldy nyǵaıtýdyń mańyzdy faktory ekenin atap ótti.
Onyń aıtýynsha, Kaspıı teńiziniń jaǵalaýynda ornalasqan Qazaqstan men Ázerbaıjan iri kólik jobalaryn júzege asyrýda sheshýshi ról atqarady.
— Bizdiń elder arasyndaǵy belsendi yntymaqtastyqsyz Kaspıı óńirindegi kez kelgen iri kólik jobasyn júzege asyrý múmkin bolmas edi, — dedi Ilham Álıev.
Prezıdent Qazaqstannyń porttary men logıstıkalyq ınfraqurylymdy belsendi túrde jańǵyrtyp jatqanyn aıtty. Sondaı-aq ol Qazaqstan, Ázerbaıjan, Grýzııa jáne Túrkııa arasyndaǵy tórtjaqty yntymaqtastyq formatynyń tabysty jumys istep jatqanyn jetkizdi. Onyń aıasynda tarıftik saıasatty úılestirý, tsıfrlandyrý, ákimshilik rásimderdi jeńildetý jáne júk tasymalynyń tıimdiligin arttyrý máseleleri qarastyrylyp keledi.
Ilham Álıev 2024 jyly Qazaqstan, Ázerbaıjan jáne Ózbekstan basshylary Kaspıı teńiziniń tabany arqyly energetıkalyq dáliz salý týraly kelisimge qol qoıǵanyn eske saldy. Sonymen qatar Kaspıı teńiziniń túbimen Qazaqstan men Ázerbaıjandy jalǵaıtyn talshyqty-optıkalyq kabel tartý jobasy júzege asyrylyp jatyr. Bul joba óńirdiń tsıfrlyq ınfraqurylymynyń mańyzdy bóligine aınalmaq.
Ázerbaıjan Prezıdenti qazirgi ýaqytta Qazaqstan munaıynyń Ázerbaıjan aýmaǵy arqyly tasymaldalyp jatqanyn aıtyp, bul eki eldiń energetıka jáne kólik salalaryndaǵy yntymaqtastyǵynyń joǵary deńgeıin kórsetetinin atap ótti.
Jýyrda Qazaqstanǵa jasaǵan sapary týraly aıta kele, Ilham Álıev Túrkistan qalasynyń tarıhı kelbeti men qazaqstandyqtardyń mádenı muraǵa degen uqypty kózqarasyna erekshe tánti bolǵanyn jetkizdi.
— Ázerbaıjan men Qazaqstan arasyndaǵy qarym-qatynastyń damyp kele jatqanyna shyn júrekten qýanyshtymyn. Baýyrlas Qazaqstanǵa jańa tabystar men órkendeý tileımin, — dedi Ázerbaıjan Prezıdenti III Shýsha jahandyq medıaforýmynda.
Buǵan deıin Qazaqstan men Ázerbaıjan arasyndaǵy áýe qatynasy keńeıip, aldaǵy ýaqytta Aqtóbe men Atyraýdan Bakýge jańa turaqty reıster ashylatynyn jazǵan edik.
