Ázerbaıjannyń burynǵy sheneýnigine elge opasyzdyq jasady degen aýyr aıyp taǵyldy

ASTANA. KAZINFORM – Ázerbaıjan prezıdenti ákimshiliginiń burynǵy basshysy Ramız Mehtıev úı qamaǵyna alyndy. Bul týraly Trend.az jazdy.

Trend.az saıtynyń habarlaýynsha, Ramız Mehtıev aýyr qylmystyq baptar boıynsha aıyptalyp, úı qamaǵyna jiberildi.

Tergeý málimetterine súıensek, Mehtıevke Ázerbaıjan Qylmystyq kodeksiniń 278.1 («Memlekettik bılikti basyp alýǵa baǵyttalǵan áreketter»), 274 («Memleketke opasyzdyq») jáne 193-1.3.2 («Qylmystyq jolmen tabylǵan múlikti zańdastyrý») baptary boıynsha aıyp taǵylyp otyr.

Baký qalasynyń Sabaıl aýdandyq soty tergeýshiler usynǵan ótinishti qanaǵattandyryp, Mehtıevke qatysty bultartpaý sharasy retinde tórt aı merzimge úı qamaǵyna alý týraly sheshim shyǵardy.

Aıta keteıik, Ramız Mehtıev 1995 jyldan 2019 jylǵa deıin Ázerbaıjan prezıdenti ákimshiligin basqarǵan, al 2019 jyldan 2022 jylǵa deıin Ulttyq ǵylym akademııasynyń prezıdenti qyzmetin atqarǵan.

Buǵan deıin Ázerbaıjan arnaıy qyzmetteri Iordanııada memleketke opasyzdyq jasady dep aıyptalǵan Azer Bagırovty ustaǵan edi. Ol Iordanııa Hashımıttik Koroldiginiń aýmaǵynda qolǵa túsip, arnaıy operatsııa arqyly Ázerbaıjanǵa jetkizildi.