Ázerbaıjan Pákistannan joıǵysh ushaqtar alyp, elge $2 mlrd ınvestıtsııa salady

ASTANA. KAZINFORM — Ázerbaıjan Pákistanmen qorǵanys baılanystaryn nyǵaıtýǵa múddeli jáne osy elge $2 mlrd ınvestıtsııa salýǵa daıyn, dep jazady Kazinform menshikti tilshisi.

Bul týraly Pákistan aqparat mınıstri Attaýlla Tarar jergilikti BAQ-qa bergen suhbatynda aıtty.

— Ázerbaıjan jaqyn arada Pákistannan JF-17 Thunder joıǵysh ushaqtarynyń alǵashqy partııasyn alady, al bolashaqta bul ushaqtardy birlesip óndirýge bolady, — dedi mınıstr.

Onyń aıtýynsha, Ázerbaıjan prezıdenti Ilham Álıev Pákistanmen qorǵanys baılanystaryn nyǵaıtýǵa úlken qyzyǵýshylyq tanytyp, osy elge $2 mlrd ınvestıtsııa salýǵa ýáde etken.

Sonymen qatar, Tarar ınvestıtsııalar boıynsha talqylaýlar aıaqtalý satysynda ekenin atap ótip, prezıdent Álıevtiń sáýir aıynda Islamabadqa sapary kezinde tıisti kelisimderge qol qoıý josparlanǵanyn rastady.

— Ázerbaıjan Prezıdenti Pákistannyń qorǵanys ónerkásibi jáne ınfraqurylymyn damytýǵa qatysty yntasyn bildirdi. Sondaı-aq, kelissózder barysynda avtomobıl joldarynyń qurylysy jáne basqa da iri jobalar qamtyldy, — dedi ol.

Aıta keteıik, 23-25 aqpanda Pákistan premer-mınıstri Muhammed Shahbaz Sharıf Ázerbaıjanǵa memlekettik saparmen bardy. Sapar barysynda qorǵanys jáne áskerı ónerkásip salasyndaǵy ózara is-árekettestikten bólek ekonomıkalyq yntymaqtastyqty keńeıtý jóninde kelissózder júrgizildi. Memleket basshylary Bakýdegi Pákistan-Ázerbaıjan bıznes-forýmyna da qatysty.

Osyǵan deıin Ázerbaıjan ushý qaýipsizdigi baqylaýyn kúsheıtetinin habarlaǵan edik.