Ázerbaıjan OSK prezıdent saılaýyna 12 úmitkerdi tirkedi

BAKÝ. QazAqparat - Ázerbaıjannyń Ortalyq saılaý komıssııasy 2018 jylǵy 11 sáýirde ótetin kezekten tys prezıdent saılaýyna 12 úmitkerdi tirkedi, dep habarlaıdy «QazAqparat» HAA-nyń Ázerbaıjandaǵy menshikti tilshisi.

OSK Ázerbaıjan Respýblıkasynyń qazirgi prezıdenti Ilham Álıevtiń, «Birtutas Ázerbaıjan» Halyq fronty partııasynyń tóraǵasy Gýdrat Gasangýlıevtiń, «Ulttyq jańǵyrý qozǵalysy» partııasynyń lıderi Faradj Gýlıevtiń, «Ázerbaıjan Sotsıaldy-demokratııalyq partııasynyń» basshysy Araz Álızadanyń, «Zamanaýı Mýsavat» partııasynyń basshysy Hafız Gadjıevtiń, «Lıberaldy-demokratııalyq partııanyń» basshysy Fýad Álıevtiń, Maıdangerler bastamashyl tobynyń atynan Razı Nýrýllaevtyń, Advokattar alqasynyń múshesi Anar Ýmýdovtyń, «Aq partııa» basshysy Týral Abbaslynyń, parlament depýtaty Zahıd Orýdjdyń, sondaı-aq ózin-ózi usynǵan Asıf Mamedov pen Elshan Gasanovtyń kandıdatýralaryn bekitti.

Eske sala keteıik, Ázerbaıjanda kezekti prezıdent saılaýy 2018 jylǵy 17 qazanda ótýi tıis edi. Aǵymdaǵy jyldyń 5 aqpanynda el prezıdenti I. Álıev 2018 jylǵy 11 sáýirde kezekten tys prezıdent saılaýyn ótkizý týraly ókimge qol qoıdy.

2016 jyldyń kúzinde ÁR Konstıtýtsııasyna engizilgen ózgeristerge sáıkes, el prezıdenti 7 jyl merzimge saılanady.

«Jańa Ázerbaıjan» bıleýshi partııasy 8 aqpanda ótken sezde I. Álıevtiń kandıdatýrasyn bekitken.