Ázerbaıjan – Ortalyq Azııa úshin Shyǵys-Batys baǵytynda senimdi tranzıttik el – sarapshy
ASTANA. KAZINFORM - Ázerbaıjan prezıdenti Ilham Álıev 9 tamyzda Astanada ótetin Ortalyq Azııa memleketteri basshylarynyń VI Konsýltatıvtik kezdesýine qatysýdy josparlap otyr. Osy oraıda Ázerbaıjan Ortalyq Azııa elderi úshin nelikten mańyzdy degen suraqtyń jaýabyn QR Prezıdentiniń janyndaǵy Qazaqstan strategııalyq zertteýler ınstıtýty (QSZI) Azııataný bóliminiń aǵa sarapshysy Baýyrjan Áýken Kazinform tilshisine suhbatynda aıtyp berdi.
Baýyrjan Áýken Ortalyq Azııa men Ázerbaıjandy elder arasyndaǵy ǵasyrlar boıy qalyptasqan baýyrlas qarym-qatynas baılanystyratynyn atap ótti. Ortaq mádenı mura memleketaralyq qarym-qatynasty odan ári nyǵaıtý jáne keńeıtý úshin berik negiz bolyp sanalady. Táýelsizdik alǵannan beri Qazaqstan men Ázerbaıjan ózara egemendik pen aýmaqtyq tutastyqty saqtaı otyryp, ekijaqty jáne kópjaqty formatta ózara is-qımyl jasap keledi. Joǵary deńgeıdegi saparlar odan ári yntymaqtastyqtyń jańa vektoryn ashady.
«Qazaqstan men Ázerbaıjan Ortalyq Azııa jáne Ońtústik Kavkazdyń geosaıası ózara baılanysy úshin strategııalyq turǵydan mańyzdy. Bul elder ekonomıkasynyń, demografııalyq jáne kóliktik áleýetiniń ósip kele jatqanyna baılanysty. Sondaı-aq, yntymaqtastyqtyń mańyzdy faktorlarynyń biri – ózara saýda men ınvestıtsııanyń ósýi. Máselen, ótken jyly taýar aınalymy tarıhı joǵary deńgeıge jetip, 529,4 mıllıon dollardy qurady, – deıdi sarapshy.
Ol eki el úshin Transkaspıı halyqaralyq kólik baǵytynyń mańyzyna toqtaldy.
«Ekijaqty qarym-qatynasta negizgi oryndy kólik-logıstıka sektory alady. Qazir Transkaspıı halyqaralyq kólik baǵytynyń qabiletin arttyrý boıynsha birlesken jumystar belsendi júrip jatyr. Ortalyq Azııa elderi úshin Ázerbaıjan – Shyǵys-Batys baǵytta senimdi tranzıt. Taǵy bir mańyzdy jobalardyń biri – «Tsıfrlyq Jibek joly». Ol Azııa men Eýropa arasynda tsıfrlyq telekommýnıkatsııa dálizin qurýdy kózdeıdi. Joba aıasynda Kaspıı teńiziniń túbimen talshyqty-optıkalyq baılanys jelisin tartý josparlanǵan. Bul óńirdegi tsıfrlandyrý men baılanys qyzmetterin damytýǵa mańyzdy úles qosady, – dep atap ótti Baýyrjan Áýken.
Sarapshy Qazaqstan men Ázerbaıjannyń qatynasyn joǵaryda atalǵan eki joba nyǵaıtady jáne bul jobalarda bizdiń elderimiz basty rólderdi atqaryp, Ortalyq Azııa men Kavkazdy Kaspıı teńizi arqyly baılanystyrady degen pikir qosty.
Sonymen qatar, Ázerbaıjandaǵy COP29 konteksinde Qazaqstannyń qoldaýyna erekshe nazar aýdarý qajet. Qazaqstan Prezıdenti Qasym-Jomart Toqaev ta bul mańyzdy oqıǵany qoldaıtynyn aıtyp, Ázerbaıjan basshysyna konferentsııaǵa baılanysty quttyqtaýyn joldap, oǵan ózi jáne Qazaqstannan delegattar kóp bolatynyn jetkizdi.
«Bul elderimiz arasyndaǵy dostyq pen jahandyq ekologııalyq bastamalarǵa adaldyqty, sondaı-aq ózekti ekologııalyq máselelerdi sheshýge daıyndyqty kórsetedi, – dep túıindedi QSZI sarapshysy.
