Ázerbaıjan Ortalyq Azııa elderi boıynsha saýda ókilin taǵaıyndady

ASTANA. KAZINFORM — Ázerbaıjan Ekonomıka mınıstrligi Samed Gasanovtyń Ortalyq Azııa elderi boıynsha (Qazaqstan, Qyrǵyzstan, Ózbekstan, Tájikstan jáne Túrikmenstan) saýda ókili bolyp taǵaıyndalǵanyn habarlady. Saýda ókiliniń jumys orny Ózbekstan Respýblıkasynda ornalasady, dep jazdy Kazinform agenttiginiń menshikti tilshisi.

Mınıstrliktiń málimetinshe, saýda ókili Ázerbaıjan men Ortalyq Azııa memleketteri arasyndaǵy saýda-ekonomıkalyq yntymaqtastyqty damytýda, Made in Azerbaijan brendin ilgeriletýde, eldiń ınvestıtsııalyq tartymdylyǵyn arttyrýda, sondaı-aq munaıǵa qatysty emes eksport kólemin ósirýde mańyzdy ról atqarady.

Samed Gasanovty taǵaıyndaý Ázerbaıjannyń Ortalyq Azııa naryǵyndaǵy ornyn nyǵaıtyp, bizdiń óndirýshiler men ınvestorlarǵa jańa múmkindikter týǵyzady, – dep atap ótti Ekonomıka mınıstrligi.

Samed Gasanov 1990 jyly týǵan. 2012 jyly Ázerbaıjan memlekettik ekonomıkalyq ýnıversıtetin «Jalpy ekonomıka» mamandyǵy boıynsha aıaqtaǵan, al 2018 jyly Belarýs Respýblıkasynyń ıAnka Kýpala atyndaǵy Grodno memlekettik ýnıversıtetinen «Quqyqtaný» mamandyǵy boıynsha dıplom alǵan.

2015 jyldan bastap Gasanov Ázerbaıjannyń eksport pen ınvestıtsııalardy yntalandyrý qorynda jumys istep, bas jobalar menedjerinen ınvestıtsııalardy qoldaý departamentiniń dırektoryna deıin ósti.

Buǵan deıin Ázerbaıjan Ortalyq Azııa memleketteri basshylarynyń Konsýltatıvtik kezdesýine teń quqyqty qatysýshy retinde resmı túrde qosylǵan bolatyn. Bul formatqa qatysý múshe elderge, sonyń ishinde saýda-ekonomıkalyq salada, yntymaqtastyqty keńeıtýge baǵyttalǵan kelisilgen sheshimder qabyldaýǵa múmkindik beredi.