Ázerbaıjan Ortalyq Azııa basshylary Konsýltatıvtik kezdesýiniń teń quqyly múshesi atandy

TAShKENT. KAZINFORM — Ázerbaıjan Ortalyq Azııa memleketteri basshylary Konsýltatıvtik kezdesýiniń teń quqyly múshesi atandy. Bul týraly sammıtte sóz sóılegen Ózbekstan prezıdenti Shavkat Mırzıeev málim etti, dep habarlaıdy Kazinform agenttiginiń menshikti tilshisi. 

Sóz basynda Shavkat Mırzıeev kezdesýge qatysýshylarǵa alǵys bildire otyryp, Ázerbaıjan prezıdenti Ilham Álıevtiń atalǵan formattyń teń quqyly múshesi atanǵanyn basa aıtty.

— Qurmetti Ilham Geıdarovıchti bul is-sharǵa Ortalyq Azııa memleketteri basshylary Konsýltatıvtik kezdesýiniń teń quqyly múshesi retinde qatysyp otyrǵanyn erekshe atap ótkim keledi. Shyn máninde, biz Ortalyq Azııa men Ońtústik Kavkaz arasynda berik kópir quryp, yntymaqtastyqtyń ortaq keńistigin qalyptastyrýǵa jol ashamyz. Bul eki óńirdiń strategııalyq ózara baılanysyn jáne turaqtylyǵyn nyǵaıta túseri sózsiz. Osy mańyzdy sheshimniń qabyldanýymen barlyq qurmetti áriptesime shyn júrekten alǵys bildiremin jáne Ilham Geıdarovıchti tolyqqandy qatysýshy retinde Konsýltatıvtik kezdesýler formatyna qosylýymen quttyqtaımyn, — dedi Shavkat Mırzıeev.

Ózbekstan basshysy búgingi kezdesý saýda-ekonomıkalyq, ınvestıtsııalyq, mádenı-gýmanıtarlyq yntymaqtastyqty keńeıtý, sondaı-aq ornyqty damý máseleleri boıynsha úılestirilgen sheshimder ázirleýge múmkindik beretinin atap ótti.

Eske salaıyq, Konsýltatıvtik kezdesýge óńir elderiniń basshylary, Ázerbaıjan prezıdenti Ilham Álıev jáne BUU-nyń Ortalyq Azııadaǵy preventıvtik dıplomatııa jónindegi aımaqtyq ortalyǵynyń basshysy Kaha Imnadze qatysyp otyr. Sammıt qorytyndysy boıynsha birqatar mańyzdy qujatty qabyldaý josparlanǵan. 

Aıta ketelik Qasym-Jomart Toqaev Ortalyq Azııa memleketteri basshylarynyń VII konsýltatıvtik kezdesýine qatysý úshin Tashkenttegi Kongress ortalyqqa kelgen edi.