Ázerbaıjan ókilderi ushaq apatyn tergeý úshin Qazaqstanǵa attandy
ASTANA. KAZINFORM – Prezıdent Ilham Álıevtiń tapsyrmasy boıynsha oqıǵanyń mán-jaıyn tergeý úshin memlekettik organdardyń ókilderi Qazaqstanǵa attandy, dep habarlaıdy Kazinform.
- Ázerbaıjan Respýblıkasynyń Prezıdenti Ilham Álıevtiń tapsyrmasy boıynsha Tsıfrlyq damý jáne Kólik mınıstri, Tótenshe jaǵdaılar mınıstri, Bas Prokýrordyń orynbasary, Densaýlyq saqtaý mınıstriniń orynbasary, Memlekettik azamattyq avıatsııa agenttigi dırektorynyń orynbasary, AZAL vıtse-prezıdenti men basqa da tıisti memlekettik organdardyń ókilderi oqıǵa ornynda tergeý jumystaryn júrgizý úshin Qazaqstannyń Aqtaý qalasyna attandy, - dep jazdy Azertag.
Eske sala ketsek, Baký- Groznyı J2-8243 nómirli reısin oryndaǵan Embraer 190 ushaǵy Aqtaý qalasynan 3 shaqyrym jerde apatty jaǵdaıda qondy.
Oqıǵa ornyna QR Tótenshe jaǵdaılar mınıstrligi jeke quramynyń 52 adamy men 11 birlik tehnıkasy bardy.
Apatqa ushyraǵan ushaq bortynda Qazaqstannyń 6 azamaty boldy.
QR Kólik mınıstrligi málim etkendeı, Ázerbaıjan tarapynyń aldyn ala aqparaty boıynsha, bortta 62 jolaýshy men 5 ekıpaj múshesi bolǵan.
QR Prezıdentiniń tapsyrmasymen Memlekettik komıssııa quryldy.