Ázerbaıjan ókili TúrkPA elderin energııa kózderi tasymalyn birlesip úılestirýge shaqyrdy

ASTANA. KAZINFORM – Túrki memleketterdiń Parlamenttik Assambleıasynyń plenarlyq otyrysynda Ázerbaıjan Respýblıkasy Mıllı Medjlısiniń tóraıymy Sagıba Gafarova TúrkPA-ǵa múshe elderdi energııa kózderiniń tasymaldaý alasynda birlesip áreket etýge shaqyrdy.

- Bizdiń aımaqta qazir taǵy da keıbir geosaıası kúrdeli jaǵdaılar oryn alyp otyr. Osyndaı jaǵdaıda ózara qarym-qatynasymyzdy nyǵaıtýymyz kerek. Ásirese energııa kózderin tasymaldaý, logıstıkalyq júıelerimizdi nyǵaıtyp, birizdendirý máselesin de birlesip áreket etýimiz kerek, - dedi ol.

Ázerbaıjan Parlamentiniń jetekshisi túrki áleminiń birligi jolynda qurylǵan uıymdar men ınstıtýttardyń bári jemisti jumys istep kele jatqanyn atap ótti.

- TúrkPA óziniń 15 jyldyq tarıhynda óte tabysty jumys júrgizip keledi. Parlamentterimizdiń arasyndaǵy qarym-qatynas saıası-ekonomıkalyq, mádenı-gýmanıtarlyq salalarda nyǵaıyp keledi. Jalpy parlamenttik dıplomatııanyń róli artyp otyr. Biz, ásirese, zańnamalarymyzdy birizdendirý, zańdarymyzdyń mazmunyn jaqyndatý jolynda óte aýqymdy jobalardy iske asyrdyq. Bul ońaı bolǵan joq. Soǵan qaramastan ortaq údeden shyǵa bildik. Parlamentaralyq baılanystardy budan ári nyǵaıta túsýimiz kerek, - dedi Sagıba Gafarova.

Sondaı-aq, búgin Prezıdent Qasym-Jomart Toqaev TúrkPA-ǵa múshe elder parlamentteriniń spıkerlerimen kezdesti.