Ázerbaıjan NATO-nyń Ozyq tájirıbe ortalyǵyna qosyldy

ASTANA. KAZINFORM – Tehnıkalyq kelisim eldiń atalǵan ortalyqtyń teńiz qaýipsizdigi salasyndaǵy qyzmetine (MARSEC COE) qosylýyn qarastyrady, dep habarlaıdy Kazinform agenttiginiń menshikti tilshisi.

- Ázerbaıjannyń Teńizdegi qaýipsizdikti jetildirý salasyndaǵy Ozyq tájirıbe ortalyǵyn (DGMM/MARSEC COE) qurýǵa qatysýyn kózdeıtin tehnıkalyq reglamentke NATO-nyń odaqtas Transformatsııalaý qolbasshylyǵy Túrkııa, Portýgalııa, Rýmynııa jáne Grekııa ókilderiniń qatysýymen qol qoıdy, - delingen Túrkııa qorǵanys mınıstrligi taratqan málimdemede.

Vedomstvoda atap ótkendeı, kelisimge sáıkes ázerbaıjandyq qyzmetkerler MARSEC COE-de turaqty negizde jumys isteı bastaıdy. Qatysýshy elder týlarynyń arasynda Ázerbaıjannyń týy da ortada kóteriledi.

Ázerbaıjannyń NATO-men yntymaqtastyǵy 1992 jyly el Soltústikatlantıkalyq Yntymaqtastyq Keńesiniń konsýltatıvtik forýmyna qosylǵan kezden bastaldy. Qazirgi ýaqytta alıanspen áriptestik áskerı bilim, qorshaǵan ortany qorǵaý, ǵylym jáne ınnovatsııa salalarynda, sondaı-aq «Beıbitshilik úshin seriktestik», «NATO-nyń operatsııalyq múmkindikteri tujyrymdamasy» jáne t.b. túrli baǵdarlamalar aıasynda júzege asyrylyp otyr.

Ótken jyldyń qazan aıynda Bakýde energetıkalyq qaýipsizdik pen klımattyń ózgerýi máselelerin zertteýge arnalǵan dóńgelek ústel ótti.

Forým Ázerbaıjannyń NATO-nyń «Beıbitshilik úshin áriptestik» qurylymdyq qujatyna qosylýynyń 30 jyldyǵy aıasynda uıymdastyryldy. Buǵan deıin naýryz aıynda Bakýge sapary barysynda NATO Bas hatshysy I.Stoltenberg áriptestik odan ári nyǵaıa túsedi dep kútetinin málimdegen.

Aıta keteıik, Ázerbaıjan Reseı azamattarynyń elge kirý erejelerin qatańdatpaq.