Ázerbaıjan munaı qory BAÁ gaz ınfraqurylymyna 50 mln dollar ınvestıtsııalady

ASTANA. KAZINFORM — Ázerbaıjannyń Memlekettik munaı qory (SOFAZ) Birikken Arab Ámirlikteriniń (BAÁ) gaz tasymaldaý ınfraqurylymynyń aktıvterine 50 mln dollar strategııalyq ınvestıtsııa quıylatynyn jarııalady, dep habarlaıdy Kazinform menshikti tilshisi. 

Әзербайжан мұнай қоры БАӘ газ инфрақұрылымына 50 млн доллар инвестициялады
Фото: Depositphotos

Investıtsııa BAÁ energetıkalyq ekojúıesiniń negizgi elementi — ADNOC Gas Pipeline Assets LLC (AGPA) kompanııasyna baǵyttalǵan. Joba Ábý-Dabıde ornalasqan Lunate Capital jahandyq ınvestıtsııalyq platformasy basqaratyn arnaıy qor arqyly júzege asyrylyp jatyr.

SOFAZ úshin bul ınvestıtsııa munaı baǵasyna táýeldilikti azaıtýǵa jáne bolashaqta turaqty kiristi qamtamasyz etýge baǵyttalǵan jahandyq ártaraptandyrý strategııasynyń bóligi. 

— Bul ınvestıtsııa bizdiń uzaq merzimdi kózqarasymyzdy kórsetedi: turaqtylyq, senimdilik jáne jahandyq ártaraptandyrý, — dep atap ótti SOFAZ baspasóz qyzmeti.

ADNOC Gas Pipeline-men mámile SOFAZ-tyń Taıaý Shyǵystaǵy ınfraqurylymǵa basqa tikeleı ınvestıtsııalary úshin esik ashady dep boljanyp otyr. Sarapshylardyń shamalaýynsha, qor sheteldegi energetıkalyq, kóliktik jáne tehnologııalyq aktıvterge qatysýyn jalǵastyrady. 

Sońǵy jyldary Baký men Ábý-Dabı jasyl energetıkaǵa ınvestıtsııa salýdan bastap logıstıka men qarjyǵa deıin ekonomıkalyq yntymaqtastyqty nyǵaıtyp keledi. Jańa mámile Ázerbaıjan men BAÁ arasynda ásirese energetıka jáne kóliktik hab salalarynda keńirek ınvestıtsııalyq dıalogtyń bastalýyn belgileýi múmkin.
Ázerbaıjan Memlekettik munaı qory 60 mlrd dollardan astam aktıvti basqarady. Qordyń negizgi maqsaty — Ázerbaıjannyń halyqaralyq munaı jáne gaz kelisimderin júzege asyrýdan túsetin kiristerin jınaqtaý jáne tıimdi basqarý.

Aıta ketelik Qazaqstan munaıyn Ázerbaıjan arqyly tasymaldaý kólemi 3 mln tonnaǵa jetken edi

Сейчас читают