Ázerbaıjan muǵalimderi qazaqstandyq áriptesteriniń tájirıbesin úırenýge kelmek

NUR-SULTAN. QazAqparat – Ázerbaıjan muǵalimderi qazaqstandyq áriptesterinen tájirıbe jınaqtaýǵa keledi. Bul týraly Ázerbaıjannyń bilim mınıstri Emın Amrýllaev QR Oqý-aǵartý mınıstri Ashat Aımaǵambetovpen kezdesýinde aıtty, dep habarlaıdy QazAqparat.

«Biz Qazaqstan uıymdastyratyn oqýshylar arasyndaǵy olımpıadanyń birde-birin jiberip almaǵanymyzdy maqtanyshpen aıta alamyz. Árıne, kórgenimiz ózimiz úshin óte qyzyq. Sebebi, sizderde WorldSkills qozǵalysy (kolledj stýdentteri arasyndaǵy álem chempıonaty) aýyz toltyryp aıtarlyqtaı deńgeıde damyǵan. Bizge Qazaqstannyń tájirıbesin zertteýge ýaqyt kerek. Múmkin keıbir komandalar bizdiń balalarmen birge jattyǵady. Mysaly, fızıka, ınformatıka, matematıka pánderinen olımpıadalarda. Biz elimizde STEAM festıvalin ótkizemiz jáne oǵan qazaqstandyq mektepterdi qatysýǵa shaqyramyz. Meniń oıymsha, mekteptermen birlesip jumys isteý bizge qyzyqty bolady. Qazan aıynda muǵalimderimiz Qazaqstanǵa kelip, áriptesteriniń tájirıbesin úırenýi úshin tıisti qujattardy jibere alamyz», - dedi Emın Amrýllaev.

Ol sondaı-aq, Qazaqstan men Ázerbaıjan úshin aımaqtyq bilim berý platformasyn qurý ıdeıasy týraly aıtty. Qazirdiń ózinde Ázerbaıjan, Túrkııa, Grýzııa jáne Belarýs elderi osy baǵytta yntymaqtastyq ornata bastady.

QR Oqý-aǵartý mınıstri Ashat Aımaǵambetov Qazaqstannyń birlesip jumys isteýge daıyn ekenin atap ótti. Vedomstvo basshysy elimiz qazaqstandyq balalardyń STEAM festıvaline qatysýyna jaǵdaı jasaıtynyn jáne ázerbaıjandyq muǵalimder úshin tanystyrý jumystaryn júrgizetinin aıtty.