Ázerbaıjan men Ózbekstan birlesken mýzykalyq jobany iske asyrýǵa kelisti
ASTANA. KAZINFORM – Ázerbaıjan men Ózbekstan arasynda birlesken mýzykalyq jobany júzege asyrý týraly kelisimge qol jetkizildi, dep habarlaıdy AZERTADJ.
Bakýdiń Tashkenttegi elshiligi janyndaǵy Geıdar Álıev atyndaǵy Ázerbaıjan mádenı ortalyǵy dırektory Akıf Marıflı men Ózbekstan memlekettik konservatorııasynyń rektory Kamolıddın Ýrınbaev arasynda ótken kezdesýde ekijaqty yntymaqtastyqty keńeıtý máseleleri talqylandy.
Taraptar mýzyka salasyndaǵy áriptestikti damytý, stýdentterdiń shyǵarmashylyq belsendiligin qoldaý, ǵylymı jáne shyǵarmashylyq tájirıbe almasý, sondaı-aq birlesken jobalardy júzege asyrý baǵyttary boıynsha pikir almasty.
Kezdesý barysynda mýzykalyq bilim berý salasyndaǵy ózara is-qımyldy nyǵaıtý, jas oryndaýshylarǵa jańa múmkindikter ashý jáne bolashaqta túrli formattaǵy ortaq mádenı is-sharalar uıymdastyrý máseleleri qaraldy.
Sonymen qatar konservatorııa janyndaǵy Mýzykalyq aspaptar mýzeıinde ártúrli elderdiń mádenıetin tanytatyn ekspozıtsııalar bar ekenin eskere otyryp, onda Ázerbaıjannyń ulttyq mýzykasy men aspaptaryna arnalǵan «Ázerbaıjan buryshyn» ashý týraly kelisim jasaldy.
Sapar aıasynda qonaqtar stýdentterdiń kontserttik baǵdarlamasyn tamashalap, jas mýzykanttardyń ónerine joǵary baǵa berdi.
Aıta keteıik, buǵan deıin Qazaqstan, Ózbekstan jáne Tájikstandy qamtyǵan mádenı sapar bastalǵany habarlandy.
