Ázerbaıjan men Mońǵolııa memlekettik qyzmet kórsetýdiń qazaqstandyq tájirıbesimen tanysty
ALMATY. KAZINFORM – «Digital Almaty 2025» halyqaralyq tsıfrlyq forým aıasynda Ázerbaıjan jáne Mońǵolııa respýblıkasynyń delegatsııalary Almatyda ornalasqan halyqqa qyzmet kórsetý ortalyqtarynyń birinde boldy.
Ázerbaıjan jáne Mońǵolııa elinen kelgen qonaqtarǵa halyqqa qyzmet kórsetý ortalyǵynyń jumysy ondaǵy jańashyldyqtar keńinen tanystyryldy.
Qujat qabyldaýdan bastap, elektrondy proaktıvti kórsetiletin qyzmetter, mobıldi qosymsha arqyly memlekettik qyzmetti onlaın alýǵa bolatyn servıster kórsetildi. Qonaqtardyń erekshe nazaryn aýdarǵan qujattama termınaly boldy. Onyń kómegimen turǵyndar 5 mınýt ishinde tólqujat pen jeke kýálikke tapsyrys berip, túsken sýretin tańdap, memlekettik baj salyǵyn tóleı alady.
Sondaı-aq táýlik boıy jumys isteıtin kez-kelgen ýaqytta daıyn qujattardy alyp ketýge bolatyn postamattar kórsetildi. Sheteldik qonaqtar ortalyqtaǵy aımaqqa bólinip qyzmet kórsetý, jeńildik terezeleri, kútý zaldary, ana men bala bólmesi halyq úshin óte yńǵaıly ekenin atap ótti.
– Halyqqa qyzmet kórsetý ortalyǵyndaǵy qyzmet kórsetý sapasy bizge unady. Qujat berýden bastap, áleýmettik kórsetiletin qyzmetterge deıin bári joǵary deńgeıde. Qazirgi zamanǵy tehnologııany barynsha qoldaný ár turǵynnyń ýaqytyn únemdeý dep bilemiz. Aldaǵy ýaqytta jemisti áriptestik ornatamyz dep oılaımyn jáne sizderdi Bakýde kútemiz, – dedi óz sózinde Ázerbaıjan delegatsııasynyń ókili, IT baǵyty boıynsha DOST agenttigi basqarma tóraǵasynyń keńesshisi Nazılıa Gashım Zade.
Kórshiles memleketten kelgen delegattar, qyzmet kórsetýdegi jańashyldyqtar men ınnovatsııalyq jobalardyń kósh ilgeri ekenin jetikizdi.
– Biz qyzmet alý ár turǵyn úshin sapaly ári jyldam etýdi maqsat etip otyrmyz. Memlekettik korporatsııa tsıfrlyq júıege ótý arqyly ár kezeńde memlekettik qyzmet kórsetýdi ońtaılandyryp, kedergisiz alýdy kózdeıdi. Bul óz kezeginde halyqqa jyldam ári sapaly qyzmet kórsetý degen sóz, – dedi «Azamattarǵa arnalǵan úkimet» memlekettik korporatsııasy basqarma tóraǵasynyń orynbasary Aıbat Іlııasov.
Eske salaıyq, Almatyda Digital Almaty-2025 tsıfrlyq forýmy ótip jatyr. Oǵan 40 myńnan asa adam qatysýda.