Ázerbaıjan men Qytaı Transkaspıı baǵyty boıynsha tranzıttik tasymaldaýdy arttyrady
ASTANA. KAZINFORM – «Ázerbaıjan temir joldary» (AZD) JAQ men Qytaı temir joldary memlekettik korporatsııasy halyqaralyq júk tasymaly jáne kólik dálizderin damytý salasyndaǵy ózara túsinistik týraly memorandýmǵa qol qoıdy, dep habarlaıdy Kazinform menshikti tilshisi AZD-ǵa silteme jasap.
Beıjińde «Ázerbaıjan temir joldary» JAQ (AZD) tóraǵasy Rovshan Rýstamov «Qytaı temir joldary» memlekettik korporatsııasynyń prezıdenti Sýn Sıýdomen kezdesti.
Basqosý barysynda eki eldiń temirjol qurylymdary arasyndaǵy seriktestik tranzıttik jáne mýltımodaldy tasymaldaýdan bastap ınfraqurylymdy damytý men úderisterdi tsıfrlandyrýǵa deıingi keń aýqymdy qamtıtyny basa aıtyldy. Transkaspıı halyqaralyq kólik baǵytyna (Orta dáliz) erekshe nazar aýdaryldy.
2024 jyly Ázerbaıjan men Qytaı arasyndaǵy temirjol arqyly júk tasymaldaý kólemi 47 paıyzǵa artyp, 612 myń tonnaǵa jetkeni atap ótildi. 2025 jyldyń birinshi jartyjyldyǵynda Qytaıdan 199 konteınerlik bloktyq poıyzdar qabyldansa, jyl sońyna deıin 400-den astamy kútilip otyr.
Kezdesý qorytyndysy boıynsha taraptar AZD men Qytaı temir joldary arasynda ózara túsinistik týraly memorandýmǵa qol qoıdy. Qujat tranzıtti damytýdy, protsesterdi tsıfrlandyrýdy jáne Qytaı tarapynyń birlesken mýltımodaldy jobalarǵa qatysýyn, onyń ishinde Middle Corridor Multimodal Ltd kompanııasyn qarastyrady.
Sapar barysynda Rovshan Rýstamov «Qazaqstan temir joly» UK» AQ basqarma tóraǵasy Talǵat Aldybergenovpen de kezdesti. Qytaı-Eýropa baǵyty boıynsha úılestirýdi keńeıtý talqylandy.
Buǵan deıin Kazinform Shansı provıntsııasynan transkaspıı baǵyty boıynsha júk poıyzy alǵash ret jolǵa shyqqanyn jazǵan edik. Ol Qazaqstan arqyly ótedi.