Ázerbaıjan men Italııa birlesken kásiporyndar qurý týraly kelisimge qol qoıdy
ASTANA. KAZINFORM – Eki eldiń birlesken kásiporyndar qurý týraly kelisimge qol qoıǵanyn Ázerbaıjannyń Ekonomıka mınıstri Mıkaıl Djabbarov X áleýmettik jelisindegi paraqshasynda jazdy.
– Italııa-Ázerbaıjan dóńgelek ústeli barysynda biz jańa birlesken óndiristik jáne qyzmet kórsetý kásiporyndaryn qurýǵa, ǵylymı-zertteý jáne tájirıbelik-konstrýktorlyq bastamalardy ilgeriletýge, bilim almasýdy yntalandyrýǵa baǵyttalǵan kelisimderge qol qoıdyq. Bul kelisimder ınnovatsııalar men ekonomıkalyq ósimge yqpal etip qana qoımaı, elderimiz arasyndaǵy ekijaqty qarym-qatynastardy odan ári nyǵaıta túsedi, - dep jazdy.
Italııa-Ázerbaıjan saýda palatasynyń prezıdenti Manýel Traldıdiń aıtýynsha, birlesken kásiporyn Ázerbaıjandaǵy óndiris protsesterine ıtalııalyq ozyq tehnologııalardy engizýge múmkindik beredi, bul ekonomıkany odan ári ártaraptandyrýǵa yqpal etedi.
Birlesken kásiporynnyń basym baǵyttary aýyl sharýashylyǵy men ónerkásip sektory, sonyń ishinde munaı-hımııa jáne metallýrgııa salasyn qamtıdy.
Aıta keteıik, beısenbi kúni Italııaǵa jumys sapary barysynda Ázerbaıjan prezıdenti Ilham Álıev prezıdent Serdjo Mattarellamen, Italııa Mınıstrler keńesiniń tóraǵasy Djordjııa Melonımen jáne Eni S.P.A ıtalııalyq kompanııasynyń bas atqarýshy dırektory Klaýdıo Deskaltsımen kezdesti.
Taraptar Eni men Ázerbaıjan memlekettik munaı kompanııasy – SOCAR arasyndaǵy yntymaqtastyqty keńeıtý múmkindikterin egjeı-tegjeıli talqylady.
Kelissózder nátıjesinde Baký men Rım bıootyn jáne bıoshıkizat, parnıktik gazdar shyǵaryndylaryn azaıtý, sondaı-aq energııamen jabdyqtaý qaýipsizdigin qamtamasyz etý maqsatynda óndirý jáne munaı-gaz jobalary boıynsha kelisimderge qol qoıdy.
Buqaralyq aqparat quraldarynyń habarlaýynsha, Ázerbaıjan men Italııa arasyndaǵy taýar aınalymy 2023 jyly 15,7 mıllıard dollarǵa jetip, munaı men gaz eksporty 2024 jyldyń birinshi jartyjyldyǵynda Ázerbaıjannan Italııaǵa jetkizilgen gaz 5,5 paıyzǵa ósken.
