Ázerbaıjan men Iran Kaspıı teńizinde kommertsııalyq keme qatynasyn qalpyna keltirdi
ASTANA. KAZINFORM – Ázerbaıjan men Iran arasyndaǵy kommertsııalyq keme qatynasy tabıǵı faktorlardyń áserinen uzaq ýaqyt toqtap qalǵannan keıin Irannyń Astara portynda qaıta iske qosyldy. Bul týraly Irannyń jol jáne qala qurylysy mınıstriniń orynbasary, Porttar jáne teńiz kóligi uıymynyń basshysy Saıd Rasýlı málim etti, dep habarlaıdy Kazinform tilshisi IRIB NEWS AGENTY-ge silteme jasap.
Onyń aıtýynsha, júk kótergishtigi 1 600 tonna bolatyn Ázerbaıjannan qurylys materıaldaryn jetkizgen júk kemesi birinshi bolyp shyqqan.
Buǵan deıin bul baǵytta keme qatynasy Kaspıı teńizindegi sý deńgeıiniń tómendeýine jáne porttyń kireberis arnasynda aıtarlyqtaı shógindilerdiń paıda bolýyna baılanysty toqtatylǵan bolatyn. 2025 jyldyń sáýir aıynan bastap Astarada tereńdetý jumystary júrgizildi.
Búgingi tańda akvatorııadan shamamen 150 myń tekshe metr laı men qum shyǵaryldy. Bul farvater tereńdigin qalpyna keltirýge jáne kemelerdiń qaýipsiz ótýin qamtamasyz etýge múmkindik berdi.
Saıd Rasýlı Astara portynyń májbúrli úzilisten keıin ashylýy Irannyń Kaspıı teńizindegi kólik-logıstıkalyq belsendiligin arttyryp, aımaqtyq saýda baılanystaryn nyǵaıtýǵa jáne port ınfraqurylymyn damytýǵa yqpal etetinin basa aıtty.
Irannyń soltústik bóliginde ornalasqan Astara porty Kaspıı teńizi basseınindegi elder arasyndaǵy transshekaralyq tasymaldaýda mańyzdy ról atqarady jáne halyqaralyq «Soltústik-Ońtústik» kólik dáliziniń bóligi sanalady.
Eske sala keteıik, buǵan deıin Qytaı muhıtty zertteýge arnalǵan ıntellektýaldy keme jasap shyǵarǵanyn habarlaǵan edik.