Ázerbaıjan men Grýzııa júk poıyzdarynyń shekaradan ótý ýaqytyn eki esege qysqartady
ASTANA. KAZINFORM – Ázerbaıjan men Grýzııa memlekettik shekara arqyly ótetin júk poıyzdarynyń júrý ýaqytyn eki esege jýyq qysqartýǵa jáne Orta dáliz boıyndaǵy júk tasymalynyń tıimdiligin arttyrýǵa múmkindik beretin sharalar týraly kelisimge keldi. Bul týraly Kazinform agenttiginiń menshikti tilshisi habarlaıdy.
Tıisti sheshimder eki eldiń temirjol ákimshilikteri basshylary men salalyq memlekettik organdar ókilderiniń shekaradaǵy Bóıúk-Kesik stantsııasynda ótken jumys kezdesýinde qabyldandy.
Taraptar Bóıúk-Kesik — Tbılısı — Bóıúk-Kesik ýchaskesinde elektrovozdardyń poıyz quramdaryn ajyratpaı júrýin uıymdastyrýǵa, sondaı-aq vagondardy tehnıkalyq tekserýdi qaıtalaýdan bas tartýǵa kelisti. Jańa tártipke sáıkes, tekserý shekaranyń ár jaǵynda bir ret qana júrgiziledi: Ázerbaıjannan shyqqan poıyzdar úshin — Bóıúk-Kesik stantsııasynda, al keri baǵytta — Tbılısı stantsııasynda. Jańa júıe synaqtan sátti ótti.
Kezdesý barysynda temirjol ákimshilikteri men keden qyzmetteri arasyndaǵy tsıfrlyq derekter almasýdy keńeıtý, sondaı-aq Baký — Tbılısı baǵyty boıynsha qosymsha jolaýshylar poıyzyn iske qosýǵa daıyndyq jáne shekaralyq ári kedendik rásimderdi jeńildetý máseleleri de talqylandy.
Kelisimder halyqaralyq júk tasymalyn jedeldetýge, Orta dálizdiń tranzıttik áleýetin nyǵaıtýǵa jáne ony Eýrazııadaǵy negizgi kólik baǵyttarynyń biri retinde básekege qabiletti etýge yqpal etedi dep kútilýde.
Buǵan deıin Grýzııa men Túrkııanyń júk tasymalyna arnalǵan elektrondyq ruqsat júıesine kóshkeni habarlanǵan bolatyn.
Sondaı-aq Grýzııanyń Ázerbaıjan jáne Armenııa shekarasyna deıin jańa joǵary jyldamdyqty avtojol salatyny týraly jazǵan edik.
