Ázerbaıjan men Grýzııa shekaradaǵy júk kólikteriniń kezegin rettemek
ASTANA. KAZINFORM – Ázerbaıjan men Grýzııa keden qyzmetteriniń basshylyǵy eki eldiń memlekettik shekarasynda júk kólikteriniń jınalyp qalýyna baılanysty kelissózder júrgizdi, dep habarlaıdy óńirdegi Kazinform agenttiginiń menshikti tilshisi.
Ázerbaıjan Memlekettik keden komıtetiniń málimetinshe, kelissóz barysynda taraptar shekaradaǵy qazirgi jaǵdaıdy, sondaı-aq júk kólikteriniń jınalyp qalýyn joıý jáne olardyń shekaradan ótýin jedeldetý máselelerin talqylady.
Kezdesý qorytyndysy boıynsha júk kólikteriniń kezegin azaıtý jáne memlekettik shekaradan ótý úderisin jedeldetý úshin qajetti sharalardy qabyldaý týraly ýaǵdalastyqqa qol jetkizildi.
Ázerbaıjandyq buqaralyq aqparat quraldary Ázerbaıjannyń Qurlyq kóligi agenttigine silteme jasap habarlaǵandaı, Ázerbaıjan men Grýzııa shekarasyndaǵy «Qyzyl kópir» ótkizý beketinde Ázerbaıjan tarapynan 1 030 júk kóligi kezekte turǵan.
Sondaı-aq Reseımen shekaradaǵy «Samýr» keden beketinde 47 júk kóligi, Iranmen shekaradaǵy «Astara» beketinde 37 júk kóligi kezekte tur. Al «Mazymqara» beketinde kezek joq.
Taraptar júk kólikteriniń memlekettik shekara arqyly kedergisiz qozǵalysyn qamtamasyz etý boıynsha ózara is-qımyldy jalǵastyryp jatyr.
Buǵan deıin Grýzııanyń Ázerbaıjan jáne Armenııa shekaralaryna deıin jańa jedel jol salatyny habarlanǵan bolatyn.
