Ázerbaıjan men Grýzııa 6 jyldan keıin temirjol qatynasyn qaıta bastaıdy
ASTANA. KAZINFORM - Baký men Tbılısı arasyndaǵy jolaýshylar temirjol qatynasy 26 mamyrdan bastap qalpyna keledi. Bul týraly agenttiktiń menshikti tilshisi Grýzııanyń birinshi habar taratý arnasyna silteme jasap habarlady.
Temirjol qatynasyn qaıta ashý týraly sheshim Grýzııanyń ekonomıka jáne turaqty damý mınıstri Marıam Kvrıvıshvılı men Ázerbaıjannyń tsıfrlyq damý jáne kólik mınıstri Rashad Nabıev qol qoıǵan ekijaqty úılestirý keńesiniń hattamasynda bekitildi.
Qujatqa sáıkes, Baký-Tbılısı-Kars jobasynyń jańa temirjol ýchaskesi jańartý jumystary aıaqtalǵan soń tolyq iske qosylady. Infraqurylym «BTKI Railways» birlesken kásipornyna berilip, temirjol jelisin basqarý osy kompanııanyń quzyretinde bolady.
Temirjol qatynasyn qalpyna keltirý sheshimi Grýzııa premer-mınıstri Iraklıı Kobahıdzeniń Ázerbaıjanǵa resmı sapary kezinde qabyldandy. Ol sapar BUU qalalarynyń 13-shi búkilálemdik forýmyna qatysý maqsatynda uıymdastyryldy. Ekijaqty kelisimder paketine qol qoıý rásimi 18 mamyrda Bakýde ótti. Oǵan Ázerbaıjan prezıdenti Ilham Alıev pen Grýzııa úkimetiniń basshysy qatysty.
Taraptar Ońtústik Kavkazdaǵy kólik baılanystaryn odan ári damytý qajettigin atap ótti. Arnaıy nazar Ázerbaıjan men Grýzııanyń aımaqtaǵy negizgi kólik-logıstıkalyq habtar retindegi róline aýdaryldy.
Temirjol salasyndaǵy kelisimderden bólek, eki el energetıka salasynda da úkimetaralyq kelisimderge qol qoıdy. Oǵan Grýzııaǵa tabıǵı gaz, qosymsha kólemdegi ázerbaıjandyq gazdy halyqaralyq naryqtarǵa jetkizý, sondaı-aq elektr energııasyn jetkizý jáne ony Grýzııa arqyly Túrkııaǵa tasymaldaý kiredi.
Baký men Tbılısı arasyndaǵy jolaýshylar temirjol qatynasynyń qalpyna kelýi eki el arasyndaǵy týrıstik, iskerlik jáne gýmanıtarlyq baılanystardy nyǵaıtýǵa, sondaı-aq aımaqtyń tranzıttik tartymdylyǵyn arttyrýda mańyzdy qadam bolady dep kútilýde.
Aıta keteıik, Azerbaıdjannyń qurlyqtaǵy shekaralary 2020 jyldan beri COVID-19 pandemııasyna baılanysty jabylǵan edi. Shekteýler ár jarty jyl saıyn uzartylyp otyrǵan.
Osyǵan deıin Ázerbaıjannyń Islam azyq-túlik qaýipsizdigi uıymyna qosylǵany týraly jazdyq.
