Ázerbaıjan men Armenııa shekarany belgileý tártibin talqylady
ASTANA. KAZINFORM – Ázerbaıjan men Armenııa shekarasynda eki eldiń vıtse-premerleriniń tóraǵalyǵymen memlekettik shekarany delımıtatsııalaý jónindegi memlekettik komıssııanyń 10-shy kezdesýi ótti. Bul týraly agenttiktiń menshikti tilshisi habarlaıdy.
Kezdesý barysynda Ázerbaıjan Premer-mınıstriniń orynbasary Shahın Mustafaev pen Armenııa Premer-mınıstriniń orynbasary Mger Grıgorıan delımıtatsııalyq jumystardy odan ári júrgizý úshin shekara ýchaskeleriniń kezegi máselelerin talqylady.
Taraptar delımıtatsııalyq jumystardy júrgizý tártibi boıynsha tıisti nusqaýlyqtardyń jobalary boıynsha pikir almasty.
Ázerbaıjan men Armenııanyń delımıtatsııalyq komıssııalarynyń reglamenti 1 qarashada kúshine enetini aıtyldy. Ekijaqty komıssııanyń kezdesýi aıaqtalǵannan keıin vıtse-premerler kólik kommýnıkatsııalary máselelerin bólek talqylady.
Kelissózder qorytyndysy boıynsha eki el komıssııasynyń kezekti otyrysyn ótkizý kúni men ornyn jumys tártibine sáıkes belgileý týraly ýaǵdalastyqqa qol jetkizildi.
25 qazanda Ázerbaıjan prezıdenti Ilham Álıev Ázerbaıjan men Armenııa arasyndaǵy shekarany delımıtatsııalaý jáne qaýipsizdik jónindegi komıssııanyń birlesken qyzmeti týraly erejeni bekitý týraly Jarlyqqa qol qoıdy.
24 qazanda Armenııa prezıdenti Vaagn Hachatýrıan armıan-ázerbaıjan shekarasyn delımıtatsııalaý erejesin ratıfıkatsııalaý týraly zańǵa qol qoıdy. 23 qazanda Armenııa Parlamenti joǵaryda atalǵan erejeni birinshi oqylymda maquldaǵan edi.
Eske sala ketsek, bıyl 19 sáýirde Armenııa Respýblıkasy men Ázerbaıjan Respýblıkasy arasyndaǵy shekarany delımıtatsııalaý máseleleri boıynsha elder komıssııalarynyń segizinshi otyrysy ótti. 23 sáýirde Armenııa men Ázerbaıjan shekarasynda alǵashqy shekara baǵany ornatylǵan edi.
